អតីតប្រធានាធិបតី អ៊ុយក្រែន ថា “ពិភពលោកកុំខ្លាច ពូទីន ”

អតីតប្រធានាធិបតីអ៊ុយក្រែនលោក Petro Poroshenko បាននិយាយថា ពិភពលោកមិនគួរជឿទុកចិត្តលើព័ត៌មានដែលប្រធានាធិបតីរុស្ស៊ីលោក វ្ល៉ាឌីមៀ ពូទីន និងការិយាល័យរបស់លោកកំពុងបញ្ជូនបន្តអំពីការចរចាជាមួយអ៊ុយក្រែន បន្ទាប់ពីការលុកលុយប្រទេសនោះទេ ។

លោក Poroshenko បាននិយាយ​ពី​ទីក្រុង Kyiv ក្នុង​បទសម្ភាសន៍​ជាមួយ​ទូរទស្សន៍ CNN ថា “ខ្ញុំចង់សួរអ្នកទាំងអស់គ្នា ប្រជាជនទាំងអស់នៃពិភពលោក ជាមួយនឹងសំណួរដ៏សាមញ្ញមួយថា សូមកុំទុកចិត្តលោក ពូទីន កុំជឿ ពូទីន ហើយកុំខ្លាច ពូទីន” ។

ទន្ទឹមនោះលោក Poroshenko ក៏ត្រូវបានគេសួរអំពីការបដិសេធរបស់ប្រធានាធិបតីអ៊ុយក្រែនបច្ចុប្បន្នលោក Volodymyr Zelensky ក្នុងការមិនទទួលយកសំណើរបស់សហរដ្ឋអាមេរិកក្នុងការជម្លៀសចេញពីរដ្ឋធានី Kyiv ។

លោក Poroshenko បាន​និយាយ​អំពី​ការ​សម្រេច​ចិត្ត​របស់​ប្រធានាធិបតី​បច្ចុប្បន្ន​ថា “ខ្ញុំ​គិត​ថា​ឥឡូវ​នេះ​ជា​ពេល​សម្រេច​ចិត្ត​សម្រាប់​ប្រទេស​ជាតិ​របស់​ខ្ញុំ ។ លោកសុខចិត្តស្លាប់ ប្រសិនបើចាំបាច់ និងមានមោទនភាពចំពោះប្រជាជន និងប្រទេសរបស់លោក” ។

លោកបញ្ជាក់ថា “ខ្ញុំស្អប់គំនិតចង់ឲ្យប្រទេសទៅអ្នកផ្សេងកាន់កាប់ ហើយខ្ញុំគិតថា យើងគួរតែប្រឹងប្រែងការពារជាតិ ការពារជាតិប្រឆាំងនឹងអ្នកឈ្លានពានរុស្ស៊ី” ។

លោកបាននិយាយថា “មនុស្សជាច្រើនធ្វើការសម្រេចចិត្តដើម្បីកាន់កាំភ្លើង និងដើម្បីការពារជាតិ ។ ខ្ញុំមានមោទនភាពសម្រាប់ប្រជាជនទាំងនេះ ។ ខ្ញុំមានមោទនភាពចំពោះប្រទេសនេះ ហើយខ្ញុំមានមោទនភាពដែលបានក្លាយជាជនជាតិអ៊ុយក្រែន” ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ យន្តហោះដ្រូន អាមេរិក ទំនងដឹកនាំ អ៊ុយក្រែន វាយប្រហារលើនាវា រុស្ស៊ី