ពូទីន អរគុណកងកម្លាំង រុស្ស៊ី សម្រាប់ការបំពេញកាតព្វកិច្ចយោធានៅ អ៊ុយក្រែន

ប្រធានាធិបតីរុស្ស៊ីលោក វ្ល៉ាឌីមៀ ពូទីន បានសម្តែងការដឹងគុណជាពិសេសចំពោះកងកម្លាំងប្រតិបត្តិការពិសេសនៃសហព័ន្ធរុស្ស៊ីដែលកំពុងតែបំពេញកាតព្វកិច្ចយោធារបស់ពួកគេយ៉ាងក្លាហាននៅអ៊ុយក្រែន ។

នៅក្នុងសេចក្តីថ្លែងការណ៍ដែលចេញផ្សាយដោយវិមានក្រឹមឡាំងក្នុង “ទិវាកងកម្លាំងពិសេស” ដែលបានប្រារព្ធនៅថ្ងៃទី ២៧ ខែកុម្ភៈនេះ លោក ពូទីន បាននិយាយថា “ខ្ញុំចង់ថ្លែងអំណរគុណចំពោះមេបញ្ជាការ បុគ្គលិកនៃកងកម្លាំងប្រតិបត្តិការពិសេស អតីតយុទ្ធជននៃអង្គភាពកងកម្លាំងពិសេស សម្រាប់ភាពស្មោះត្រង់របស់ពួកគេចំពោះពាក្យសម្បថ សម្រាប់សេវាកម្មដ៏ល្អឥតខ្ចោះរបស់ពួកគេ ក្នុងនាមជាប្រជាជននៃប្រទេសរុស្ស៊ី និងមាតុភូមិដ៏អស្ចារ្យរបស់យើង” ។

លោក ពូទីន បានរំឭកថា កងកម្លាំងប្រតិបត្តិការពិសេសបានបង្ហាញម្តងហើយម្តងទៀតនូវការត្រៀមខ្លួនរបស់ពួកគេដើម្បីធ្វើសកម្មភាពប្រកបដោយប្រសិទ្ធភាព និងសមត្ថភាពក្នុងស្ថានភាពលំបាកបំផុត ក៏ដូចជាការបំពេញការដោះស្រាយកិច្ចការដ៏លំបាក និងការទទួលខុសត្រូវបំផុត ។

វាកើតឡើង នៅពេលដែលកងកម្លាំងរុស្ស៊ី និងកងជីវពលមកពីសាធារណរដ្ឋប្រជាមានិត Donetsk និង Lugansk បានចាប់ផ្តើមប្រតិបត្តិការយោធាពិសេសមួយក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ក្នុងគោលបំណងបំផ្លិចបំផ្លាញប្រទេស បន្ទាប់ពីបរាជ័យការចរចា និងបន្តការវាយប្រហារដោយកាំភ្លើងធំ និងកាំភ្លើងត្បាល់របស់អ៊ុយក្រែនលើសាធារណរដ្ឋ Donbass ។ .

ចំណាត់ការនេះក៏បានធ្វើឡើង បន្ទាប់ពីមានភាពតានតឹងកើនឡើងជាច្រើនខែនៅក្នុងតំបន់ដែលត្រូវបានសម្គាល់ដោយការបាញ់ផ្លោងកាន់តែខ្លាំងដោយកងទ័ពអ៊ុយក្រែនដែលបណ្តាលឲ្យមានជនស៊ីវិលបាត់បង់ជីវិតនៅក្នុងសាធារណរដ្ឋ Donbass ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ យន្តហោះដ្រូន អាមេរិក ទំនងដឹកនាំ អ៊ុយក្រែន វាយប្រហារលើនាវា រុស្ស៊ី