អ៊ុយក្រែន កម្ទេចសព្វាវុធ រុស្ស៊ី រាប់រយគ្រឿង និងសម្លាប់ទាហានរាប់ពាន់ នាក់ក្នុងសង្គ្រាមប៉ុន្មានថ្ងៃមកនេះ (មានវីដេអូ)

អាជ្ញាធរអ៊ុយក្រែនបាននិយាយកាលពីថ្ងៃសៅរ៍ថា យន្តហោះចម្បាំងចំនួន ១៤ គ្រឿង ឧទ្ធម្ភាគចក្រ ៨ គ្រឿង រថក្រោះ ១០២ គ្រឿង រថពាសដែកចំនួន ៥៣៦ គ្រឿង និងទាហានជាង ៣,៥០០ នាក់ដែលជាកម្មសិទ្ធិរបស់កងកម្លាំងរុស្ស៊ីត្រូវបានបាញ់ទម្លាក់ និងសម្លាប់ ។

សេចក្តីថ្លែងការណ៍មួយរបស់អគ្គសេនាធិការអ៊ុយក្រែនបាននិយាយថា ប្រទេសរុស្ស៊ីបានចាប់ផ្តើមដាក់ពង្រាយអង្គភាពយោធាបន្ថែមនៅក្នុងតំបន់តាមបណ្តោយព្រំដែនរបស់ខ្លួនជាមួយអ៊ុយក្រែន ។

សេចក្តីថ្លែងការណ៍បាននិយាយថា “តាមការប៉ាន់ស្មានការខាតបង់របស់ទាហានរុស្ស៊ីរួមមានយន្តហោះ ១៤ គ្រឿង ឧទ្ធម្ភាគចក្រ ៨ គ្រឿង រថក្រោះ ១០២ គ្រឿង រថពាសដែក ៥៣៦ គ្រឿង កាំភ្លើងធំ ១៥ ដើម ក៏ដូចជាប្រព័ន្ធកាំជ្រួចមីស៊ីល ‘Buk” ជាដើម ។

លោក Mikhail Podolyak ទីប្រឹក្សាប្រធានាធិបតីអ៊ុយក្រែនបាននិយាយនៅក្នុងសេចក្តីថ្លែងការណ៍មួយអំពីស្ថានភាពនៅក្នុងប្រទេសរបស់លោកថា ការប៉ះទង្គិចគ្នានៅតែបន្តនៅក្នុងទីក្រុង Kherson, Mykolaiv, Odesa និង Mariupol ។

ជាចុងក្រោយលោក Podolyak បាននិយាយថា “គិតត្រឹមថ្ងៃសៅរ៍ ទាហានរុស្ស៊ីជាង ៣,៥០០ នាក់ត្រូវបានសម្លាប់ និង ២០០ នាក់ត្រូវបានចាប់ដាក់គុក” ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ទីក្រុងធំទី ២ របស់ អ៊ុយក្រែន កំពុងវាយសម្រុកចូល ដោយកងកម្លាំង រុស្ស៊ី