អ៊ុយក្រែនចោទថា រុស្ស៊ី ប្រើប្រាស់គ្រាប់បែក Vacuum Bomb ដ៏ប្រល័យកាលពីម្សិលមិញ (មានវីដេអូ)

ឯកអគ្គរដ្ឋទូតអ៊ុយក្រែនប្រចាំនៅសហរដ្ឋអាមេរិក បានប្រាប់សមាជិកសភាអាមេរិកនៅក្នុងសន្និសីទខ្លីមួយថា ប្រទេសរុស្ស៊ី បានប្រើប្រាស់អាវុធកម្តៅដែលគេហាមឃាត់ ក្នុងអំឡុងពេលប្រយុទ្ធគ្នានៅប្រទេសអ៊ុយក្រែនកាលពីថ្ងៃចន្ទទី២៨ខែកុម្ភៈ។

លោកស្រី Oksana Markarova បានប្រាប់អ្នកយកព័ត៌មានថា “ពួកគេបានប្រើគ្រាប់បែកកម្តៅ Vacuum Bomb នៅថ្ងៃនេះ ដែលជាប្រភេទគ្រាប់បែក ត្រូវបានហាមឃាត់ដោយអនុសញ្ញាទីក្រុងហ្សឺណែវ”។

ទោះបីជាយ៉ាងណាក៏ដោយ ការអះអាងរបស់លោកស្រី កំពុងត្រូវបានគេពិនិត្យ។

គួរបញ្ជាក់ថា អាវុធកម្ដៅបែបនេះ គឺមិនប្រើគ្រាប់រំសេវធម្មតាទេ។ ពួកវាជំនួសមកវិញដោយសារធាតុផ្ទុះដែលមានសម្ពាធខ្ពស់ ហើយបឺតអុកស៊ីសែនពីបរិយាកាសជុំវិញ ដើម្បីបង្កើតជារលកផ្ទុះដ៏ខ្លាំង និងសម្ពាធ។ វាអាចបំផ្ទុះរាងកាយមនុស្ស និងកម្ទេចសរីរាង្គខាងក្នុង។

ការប្រើប្រាស់គ្រាប់បែក Vacuum Bomb ត្រូវបានគេមើលឃើញពីមុននៅក្នុងសាធារណៈរដ្ឋរុស្ស៊ី Chechnya។ នេះបើយោងតាមអង្គការឃ្លាំមើលសិទ្ធិមនុស្ស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អតីតបវរកញ្ញាអ៊ុយក្រែន ចាប់កាន់កាំភ្លើងក្រោកឡើងតស៊ូប្រឆាំងការវាយលុករបស់ រុស្ស៊ី