ព័ត៌មានអន្ដរជាតិ

ប្រទេសអាស៊ានមួយនេះក៏នឹងដាក់ទណ្ឌកម្មរុស្ស៊ីដែរ

បានផុស

៣ years មុន

នៅ

ថ្ងៃអង្គារ ១ មីនា ២០២២

ដោយ

រដ្ឋមន្ត្រីក្រសួងការបរទេសសិង្ហបុរី លោក Vivian Balakrishnan បាននិយាយកាលពីថ្ងៃចន្ទសម្សិលមិញថា សិង្ហបុរីនឹងដាក់ទណ្ឌកម្មលើប្រទេសរុស្ស៊ីដូចប្រទេសផ្សេងដែលគំនិតដូចគ្នា និងបានលើកឡើងថា ការវាយប្រហាររបស់រុស្ស៊ីលើអ៊ុយក្រែនគឺធ្ងន់ធ្ងរមិនធ្លាប់មាន។

ទណ្ឌកម្មនឹងរាប់បញ្ចូលទាំងការគ្រប់គ្រងការនាំចេញលើវត្ថុដែលអាចត្រូវបានប្រើប្រាស់ផ្ទាល់ ព្រមទាំងបិទធនាគាររុស្ស៊ីជាក់លាក់ និងប្រតិបត្តិការហិរញ្ញវត្ថុពាក់ព័ន្ធនឹងរុស្ស៊ី។ លោកបញ្ជាក់ថា វិធានការជាក់លាក់កំពុងត្រូវបានធ្វើការ ហើយសេចក្តីលំអិតនឹងប្រកាសឆាប់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់រដ្ឋសភា លោកបណ្ឌិត Balakrishnan បានលើកឡើងអំពីវិធីសាស្ត្ររបស់សិង្ហបុរីដើម្បីអនុវត្តគោលនយោបាយការបរទេស។ លោកថា ៖«ជំនួសឲ្យការជ្រើសរើសភាគី យើងប្រកាន់ភ្ជាប់នូវគោលការណ៍។ ដូច្នេះនៅពេលអនុវត្តគោលការណ៍បរទេសរបស់យើងប្រកបដោយស៊ីសង្វាក់គ្នា យើងក៏នឹងក្លាយជាដៃគូជឿទុកចិត្តសម្រាប់អ្នកដែលអនុវត្តគោលការណ៍ដូចគ្នា»។

លោក Balakrishnan បន្តថា សិង្ហបុរីត្រូវតែរំពឹងថា ទណ្ឌកម្មទាំងនេះនឹងប៉ះពាល់ដល់អាជីវកម្ម និងពលរដ្ឋសិង្ហបុរីខ្លះ។ «ទោះបីជាយ៉ាងណា ក្នុងនាមជាប្រទេសមួយក្រោកឈរដែលមានគោលការណ៍ជាមូលដ្ឋានសម្រាប់ឯករាជ្យ និងអធិបតេយ្យភាពនៃប្រទេសតូច សិទ្ធិផ្ទាល់ខ្លួនរបស់យើងមាន»។

លោកលើកឡើងថា សិង្ហបុរីតែងតែគោរពតាមចំពោះទណ្ឌកម្ម និងការសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិដែលឆ្លើយតបដើម្បីរក្សាសន្តិភាព និងសន្តិសុខអន្តរជាតិ ប៉ុន្តែកម្រដាក់ទណ្ឌកម្មលើប្រទេសផ្សេងក្នុងករណីដែលមិនមានការសម្រេចចិត្ត ឬការណែនាំដោយក្រុមប្រឹក្សា។

លោកក៏បានហៅការវាយប្រហាររបស់រុស្ស៊ីលើអ៊ុយក្រែនគឺជាការបំពានច្បាប់អន្តរជាតិយ៉ាងច្បាស់ និងធ្ងន់ធ្ងរដែលបង្កើតជាគំរូមិនអាចទទួលយកបាន។

លោកបញ្ជាក់ថា ៖«នេះគឺជាបញ្ហាសម្រាប់ពួកយើង។ អ៊ុយក្រែនជាប្រទេសតូចជាងរុស្ស៊ីឆ្ងាយណាស់ តែធំខ្លាំងជាងសិង្ហបុរី»៕

ប្រែសម្រួល៖ វីរបុត្រ
ប្រភព៖ CNA