ទីបំផុត រុស្ស៊ី ដាច់ចិត្តទម្លាយតួលេខទាហានស្លាប់និងរបួសហើយ

ក្រសួងការពារជាតិរុស្ស៊ីបានអះអាងថា ទាហានរបស់ខ្លួនចំនួន ៤៩៨ នាក់ត្រូវបានសម្លាប់នៅអ៊ុយក្រែន និង ១ ៥៩៧ នាក់ទៀតរងរបួស។ នេះជាលើកដំបូងដែលខ្លួនទទួលស្គាល់ថា មានជនរងគ្រោះពីការវាយលុកអ៊ុយក្រែន។

ស្របពេលជាមួយគ្នានោះ ឧត្តមសេនីយ៍ឯក Igor Konashenkov បានច្រានចោលរបាយការណ៍ដែលថា រុស្ស៊ីមានការខាតបង់ដ៏ធំធេង ដោយលោកចោទថា នោះជា ព័ត៌មានមិនពិត។

ទោះបីជាយ៉ាងណាក៏ដោយ ទីប្រឹក្សាប្រធានាធិបតីអ៊ុយក្រែន បានដាក់តួលេខខ្ពស់ជាងនេះ ហើយអះអាងថា ទាហានរុស្ស៊ីជាង ៧ ០០០នាក់ឯណោះ ត្រូវបានសម្លាប់។

ទីប្រឹក្សាក៏បាននិយាយផងដែរថា ទាហានរុស្ស៊ីរាប់រយនាក់ រួមទាំងមន្ត្រីជាន់ខ្ពស់ផងដែរ ត្រូវបានចាប់ធ្វើជាឈ្លើយសឹកសង្គ្រាម។

រហូតមកដល់ពេលនេះ ជនស៊ីវិលជាង ២ ០០០នាក់បានស្លាប់នៅក្នុងសង្គ្រាមមួយសប្តាហ៍ជាមួយរុស្ស៊ី។ នេះបើយោងតាមសេវាសង្គ្រោះបន្ទាន់រដ្ឋរបស់ប្រទេសអ៊ុយក្រែន។

ក្រសួងការពារជាតិរុស្ស៊ីថែមទាំងនិយាយផងដែរថា ទាហានអ៊ុយក្រែននិង អ្នកជាតិនិយមជាង ២ ៩៧០ នាក់ ត្រូវបានសម្លាប់ និងប្រហែល ៣ ៧០០នាក់បានរងរបួស។

យ៉ាងណាក្តី សារព័ត៌មាន Sky News មិនអាចផ្ទៀងផ្ទាត់តួលេខទាំងនេះបានទេ៕

ប្រែសម្រួល៖ Vann Vann

ប្រភព៖ SKY 

ចុចអាន៖ UN អនុម័តសេចក្តីសម្រេច ថ្កោលទោសរុស្ស៊ី ក្នុងនោះ កម្ពុជា បោះឆ្នោតគាំទ្រ តែ វៀតណាម និង ឡាវ ប្រឆាំង