លោក Zelenskyy សុំចរចាដោយផ្ទាល់ជាមួយលោក Putin តែបោះសម្តីចំអក យ៉ាងឡូយ! 

ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃព្រហស្បតិ៍ទី០៣ខែមីនា បានអំពាវនាវឲ្យមានការចរចាដោយផ្ទាល់ ជាមួយសមភាគីរុស្ស៊ីលោក Vladimir Putin ដើម្បីឲ្យជម្លោះរវាងប្រទេសរបស់ពួកគេបញ្ចប់។

ទោះជាយ៉ាងណាក៏ដោយ លោក Zelenskyy បានប្រើសម្តីចំអកឡកឡាយ ខណៈពេលដាក់សំណើរ ដោយនិយាយថា “គាត់មិនខាំទេ”។

ជាក់ស្តែងដោយសំដៅទៅកិច្ចប្រជុំថ្ងៃទី៧ខែកុម្ភៈរបស់លោក Putin ជាមួយប្រធានាធិបតីបារាំង Emmanuel Macron ដែលមេដឹកនាំទាំង២ត្រូវបានគេមើលឃើញថាអង្គុយនៅឆ្ងាយពីគ្នា, លោក Zelenskyy បានលើកឡើងថា “អង្គុយជាមួយខ្ញុំដើម្បីចរចា មិនមែនគម្លាត៣០ម៉ែត្រទេ”។

ប្រធានាធិបតីអ៊ុយក្រែនរូបនេះ​ បាននិយាយនៅក្នុងសន្និសីទសារព័ត៌មានមួយថា “ខ្ញុំមិនខាំទេ។ តើ​អ្នក​ខ្លាច​អ្វី?”។ នេះបើយោងតាមរបាយការណ៍របស់ AP។

លោក Zelenskyy និយាយថា រាល់ការពិភាក្សារវាងលោក និងលោក Putin គឺ “សំខាន់ជាងការបាញ់ប្រហារ។ វាគឺជាវិធីតែមួយគត់ដើម្បីបញ្ឈប់សង្គ្រាម”។

សេចក្តីថ្លែងការណ៍របស់លោក Zelenskyy កើតឡើងចំពេលដែលគណៈប្រតិភូអ៊ុយក្រែន ក្នុងកិច្ចពិភាក្សាជាមួយមន្ត្រីរុស្ស៊ី បានអំពាវនាវឲ្យមានបទឈប់បាញ់ និងច្រករបៀងមនុស្សធម៌ដើម្បីជម្លៀសពលរដ្ឋ ខណៈការវាយលុករបស់យោធាក្រុងមូស្គូ នៅក្នុងអតីតអ្នកជិតខាងសូវៀតបានឈានចូលដល់សប្តាហ៍ទីពីរ៕

ប្រែសម្រួល៖ Vann Vann

ប្រភព៖ Hindustan Times

ចុចអាន៖ ទាហានរុស្ស៊ី កំពុងឆ្ពោះទៅ រោងចក្រថាមពលនុយក្លេអ៊ែរ ធំបំផុតរបស់អឺរ៉ុប