ធ្លាយឯកសារសម្ងាត់ ៖ កងទ័ព រុស្សី រៀបផែនការប្រហារជីវិតជាសាធារណៈ បំបាក់ស្មារតី អ៊ុយក្រែន

កងទ័ពរបស់លោក វ្ល៉ាឌីមៀ ពូទីន គ្រោងនឹងរៀបចំផែនការប្រហារជីវិតជាសាធារណៈដើម្បីបំបាក់ស្មារតី និងទឹកចិត្តអ៊ុយក្រែន ខណៈដែលជម្លោះបង្ហូរឈាមរវាងប្រទេសទាំងពីរឈានចូលដល់សប្តាហ៍ទី ២ ។

ចាប់តាំងពីកងកម្លាំងរបស់លោក វ្ល៉ាឌីមៀ ពូទីន បានលុកលុយប្រទេសកាលពីសប្តាហ៍មុន ទាហានរបស់ពួកគេបានទទួលនូវការស្លាប់ និងរងរបួសយ៉ាងធ្ងន់ធ្ងរប្រឆាំងនឹងការតស៊ូរបស់អ៊ុយក្រែន ។

ហើយ​បើ​តាម​មន្ត្រី​ស៊ើបការណ៍​អឺរ៉ុប​មួយ​ចំនួនបានឲ្យដឹងថា លោក ពូទីន អាច​នឹងប្រែយុទ្ធសាស្ត្រទៅ​ជា​ការ​ប្រហារ​ជីវិត​ដ៏​អាក្រក់​ក្នុង​ពេល​ឆាប់ៗ​នេះ ខណៈ​ដែល​លោក​ចង់​គ្រប់​គ្រង​ប្រទេសអ៊ុយក្រែន ។

ទីភ្នាក់ងារព័ត៌មាន Bloomberg រាយការណ៍ថា ព័ត៌មានថ្មីដ៏គួរឲ្យរន្ធត់នេះបានមកពីមន្ត្រីរុស្ស៊ីអនាមិកម្នាក់ ដែលបានឃើញឯកសារពីសេវាសន្តិសុខសហព័ន្ធរបស់រុស្ស៊ី ។

ទាក់ទងនឹងប្រតិកម្មទៅនឹងព័ត៌មាននេះ និពន្ធនាយកផ្នែកនយោបាយរបស់សារព័ត៌មាន Bloomberg លោក Kitty Donaldson ក៏បានបង្ហាញផងដែរថា ប្រទេសរុស្ស៊ីកំពុងរៀបចំផែនការ “ការគ្រប់គ្រងហ្វូងមនុស្សដោយហិង្សា និងការគាបសង្កត់អ្នករៀបចំការតវ៉ា” នៅក្នុងយុទ្ធនាការរបស់ខ្លួន ។

បន្ទាប់ពីការបង្ហូរឈាមជិតមួយសប្តាហ៍មកលោក វ្ល៉ាឌីមៀ ពូទីន ទីបំផុតក៏បានទទួលស្គាល់ថាអំពីចំនួនទាហានរបស់លោកដែលបានស្លាប់នៅក្នុងការប៉ុនប៉ងដណ្តើមយកប្រទេសអ៊ុយក្រែន ។

ទន្ទឹមនោះ ក្រសួងការពារជាតិរុស្ស៊ីបាននិយាយនៅក្នុងរបាយការណ៍ដំបូងរបស់ខ្លួនថា រហូតមកដល់ពេលនេះការបាត់បង់ជីវិតផ្នែកយោធា ចាប់តាំងពីការលុកលុយរបស់ទាហានរុស្ស៊ីលើអ៊ុយក្រែនមានចំនួន ៤៩៨ នាក់ និង ១,៥៩៧ នាក់បានរងរបួស ។

ទោះបីជាយ៉ាងណាក៏ដោយ ចំនួនពិតប្រាកដនៃពលរដ្ឋ និងទាហានដែលបានស្លាប់នៅក្នុងជម្លោះទាំងសងខាងទំនងជាមានច្រើនជាងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Daily Star

ចុចអាន ៖ មេទ័ពកំពូលសំណព្វចិត្តលោក ពូទីន ត្រូវទាហាន អ៊ុយក្រែន បាញ់សម្លាប់