ព័ត៌មានអន្ដរជាតិ

លោក ពូទីន ចោទ អ៊ុយក្រែន ថាចាប់ជនបរទេសធ្វើជាចំណាប់ខ្មាំង

បានផុស

៣ years មុន

នៅ

ថ្ងៃសុក្រ ៤ មីនា ២០២២

ដោយ

ប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃព្រហស្បតិ៍បានចោទប្រកាន់អ៊ុយក្រែនថាមិនអនុញ្ញាតឲ្យជនបរទេសចាកចេញពីប្រទេសរបស់ខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះលោក ពូទីន បានចោទប្រកាន់អាជ្ញាធរអ៊ុយក្រែនថាបានចាប់ជនបរទេស “ធ្វើជាចំណាប់ខ្មាំង” ដោយបើកការបាញ់ប្រហារលើនិស្សិតចិននៅក្នុងទីក្រុង Kharkiv និងបិទជនជាតិឥណ្ឌាជាង ១,០០០ នាក់នៅស្ថានីយ៍រថភ្លើងមួយកន្លែង ។

លោកបានអះអាងថា “ការបង្កើតជាតិនិយម និងនិយមណាស៊ី ក៏ដូចជាទាហានស៊ីឈ្នួលបរទេស រួមទាំងមកពីមជ្ឈិមបូព៌ា កំពុងលាក់ខ្លួនពីក្រោយជនស៊ីវិលជាខែលការពារមនុស្ស” ។

លោកបានអះអាងថា អ្នកជាតិនិយមអ៊ុយក្រែនបានចាក់សោបិទជនស៊ីវិលនៅជាន់ខាងលើនៃអគារលំនៅដ្ឋាន និងបានដំឡើងសព្វាវុធ ក៏ដូចជាឧបករណ៍យោធានៅជាន់ផ្ទាល់ដី ដោយដឹងថា កងទ័ពរុស្ស៊ីមិនវាយប្រហារហេដ្ឋារចនាសម្ព័ន្ធស៊ីវិលនោះទេ ។

លោក ពូទីន បាននិយាយថា “ជំនួសឲ្យការបំពេញតាមការសន្យាក្នុងការដកឧបករណ៍ទាំងនេះចេញពីអគារលំនៅដ្ឋាន សាលាមត្តេយ្យ មន្ទីរពេទ្យ ផ្ទុយទៅវិញពួកគេបានដាក់រថក្រោះ កាំភ្លើងធំ កាំភ្លើងត្បាល់នៅទីនោះ ដោយដើរតួជាពួកហ្វាស៊ីស ។

សង្គ្រាមរបស់រុស្ស៊ីលើអ៊ុយក្រែនដែលបានចាប់ផ្តើមកាលពីថ្ងៃទី ២៤ ខែកុម្ភៈ បានជួបការខឹងសម្បារជាអន្តរជាតិដូចជាសហភាពអឺរ៉ុប សហរដ្ឋអាមេរិក និងចក្រភពអង់គ្លេស ក៏ដូចជាក្នុងចំណោមប្រទេសដទៃទៀតផងដែរ ដោយអនុវត្តទណ្ឌកម្មហិរញ្ញវត្ថុដ៏តឹងរ៉ឹងលើទីក្រុងមូស្គូ ។

យោងតាមតួលេខរបស់អង្គការសហប្រជាជាតិបានឲ្យដឹងថា ជនស៊ីវិល ២២៧ នាក់ត្រូវបានសម្លាប់ និង ៥២៥ នាក់បានរងរបួសនៅក្នុងប្រទេសអ៊ុយក្រែន ចាប់តាំងពីសង្គ្រាមចាប់ផ្តើម ។ យ៉ាងណាមិញ អាជ្ញាធរអ៊ុយក្រែនបានដាក់ចំនួនអ្នកស្លាប់ដល់ទៅជាង ២ ពាន់នាក់ឯណោះ ។

ចំណែកទីភ្នាក់ងារជនភៀសខ្លួនអង្គការសហប្រជាជាតិបាននិយាយថា មនុស្សជាង ១ លាននាក់បានភៀសខ្លួនចេញពីប្រទេសអ៊ុយក្រែនទៅកាន់ប្រទេសជិតខាង ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មេទ័ពកំពូលសំណព្វចិត្តលោក ពូទីន ត្រូវទាហាន អ៊ុយក្រែន បាញ់សម្លាប់