ប៉ូលិសបាញ់សម្លាប់ខ្មាន់កាំភ្លើងម្នាក់នៅវិហារមួយក្នុងទីក្រុងញូវយ៉ក

ប៉ូលិសបានបាញ់សម្លាប់ខ្មាន់កាំភ្លើងម្នាក់នៅឯវិហារ St. John the Divine ក្នុងទីក្រុងញូវយ៉ក បន្ទាប់ពីការប្រគំតន្ត្រីមុនថ្ងៃបុណ្យណូអែលកាលពីរសៀលថ្ងៃអាទិត្យ ។

យោងទៅតាមសំដីរបស់ប៉ូលិសបានឲ្យដឹងថា ក្រុមចម្រៀងមួយក្រុមកំពុងតែឈរនៅលើជណ្តើរវិហារ នៅពេលដែលជនសង្ស័យចូលទៅកន្លែងកើតហេតុដោយមានកាំភ្លើងខ្លី ២ ដើម និងបានបាញ់ទៅលើអាកាស ។

ប្រភពពីប៉ូលិសបាននិយាយថា មន្រ្តីនាយកដ្ឋានប៉ូលិសទីក្រុងញូវយ៉ក (NYPD) ២ នាក់ និងទាហានម្នាក់ដែលមានវត្តមាននៅទីនោះបានបើកការបាញ់ប្រហារទៅលើខ្មាន់កាំភ្លើងដោយបាញ់ចំក្បាល ។

លោក John Grimpel អ្នកនាំពាក្យរបស់ NYPD បានប្រាប់ទូរទស្សន៍ CNN ថា “មានការប្រគុំតន្ត្រីមួយចំនួននៅលើជណ្តើររបស់ព្រះវិហារ ហើយមានការបាញ់ប្រហារជាលក្ខណៈបុគ្គល ខណៈមន្រ្តីដែលនៅកន្លែងកើតហេតុបានបាញ់តបតជាមួយខ្មាន់កាំភ្លើងវិញផងដែរ” ។

ប្រភពពីសមត្ថកិច្ចបានប្រាប់ CNN ថា ខ្មាន់កាំភ្លើងដែលជាបុរសមានអាយុជាង ៥០ ឆ្នាំត្រូវបានប្រកាសថាបានស្លាប់នៅមន្ទីរពេទ្យ St. Luke នៅរសៀលថ្ងៃអាទិត្យ ។

ចំណែកស្នងការប៉ូលិស NYPD លោក Dermot Shea បាននិយាយថា អាវុធពាក់កណ្តាលស្វ័យប្រវត្តិចំនួន ២ ដើមត្រូវបានយកចេញពីកន្លែងកើតហេតុរួមនឹងកាបូបដែលគេជឿជាក់ថាជារបស់ជនសង្ស័យដែលផ្ទុកប្រេងសាំង ខ្សែភ្លើង ខ្សែពួរ កាំបិតជាច្រើន និងព្រះគម្ពីរគ្រិស្តសាសនា ហើយជនសង្ស័យកំពុងស្រែកថា “សម្លាប់ខ្ញុំ!” ។

នាយកដ្ឋានប៉ូលិសទីក្រុងញូវយ៉ក (NYPD) នឹងបន្តពិនិត្យមើលរូបភាពកាមេរ៉ាដែលបំពាក់នូវដងខ្លួនរបស់ប៉ូលិស ហើយឧប្បត្តិហេតុកំពុងស្ថិតក្នុងការស៊ើបអង្កេត ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ អាមេរិកចោទថា ចិនស្តុកទឹកទន្លេមេគង្គទុកប្រើខ្លួនឯង ធ្វើឲ្យប៉ះពាល់ដល់ប្រទេសនៅខាងក្រោមរួមទាំងកម្ពុជាផងដែរ

ចុចអាន ៖ រំភើប! វ៉ាក់សាំងកូវីដ របស់ក្រុមហ៊ុន Pfizer-BioNTech ទៅដល់កាណាដា ហើយ