ចិន​នៅតែ​បន្ត​ដើរតួនាទី​ស្ថាបនា​ ក្នុងការ​សម្របសម្រួល​កិច្ចចរចា​ រុស្ស៊ី​-​អ៊ុយក្រែន

ទីប្រឹក្សារដ្ឋ និងជារដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃចន្ទទី០៧ខែមីនាថា ប្រទេសចិននឹងបន្តដើរតួនាទីស្ថាបនា ក្នុងការជំរុញកិច្ចចរចាសន្តិភាពរវាងរុស្ស៊ី និងអ៊ុយក្រែន។

លោក Wang លើកឡើងថា “ប្រទេសចិនបានត្រៀមខ្លួន បន្តដើរតួនាទីស្ថាបនាដើម្បីជួយសម្រួលដល់ការសន្ទនាសម្រាប់សន្តិភាព និងធ្វើការរួមគ្នាជាមួយសហគមន៍អន្តរជាតិនៅពេលចាំបាច់ ដើម្បីអនុវត្តការសម្រុះសម្រួលចាំបាច់”។ លោកបន្ថែមថា ស្ថានភាពកាន់តែតានតឹង កិច្ចពិភាក្សាគឺកាន់តែសំខាន់។

លោក​បាន​ថ្លែង​ដូច្នេះ ​នៅ​ក្នុង​សន្និសីទ​សារព័ត៌មាន​ ខាង​ក្រៅ​សម័យ​ប្រជុំ​លើក​ទី​៥ នៃ​សភា​តំណាង​ប្រជាជន​ជាតិ​នីតិកាល​ទី​១៣។

លោក Wang ថែមទាំងនិយាយទៀតថា វិបត្តិមនុស្សធម៌ទ្រង់ទ្រាយធំគួរតែត្រូវបានទប់ស្កាត់ ហើយសមាគមកាកបាទក្រហមនៃប្រទេសចិន នឹងផ្តល់ជំនួយមនុស្សធម៌ជាបន្ទាន់ដល់អ៊ុយក្រែន។

ស្ថានភាព​ក្នុង​ប្រទេស​អ៊ុយក្រែន​ប្រែក្លាយមក​ដូច​សព្វ​ថ្ងៃ​នេះ គឺដោយសារ​តែ​មាន​ហេតុផល​ស្មុគស្មាញ​​ច្រើន​។ អ្វីដែលត្រូវការដើម្បីដោះស្រាយបញ្ហាស្មុគស្មាញទាំងនេះ គឺត្រូវត្រជាក់ចិត្ត ហើយមានគំនិតសមហេតុសមផល មិនមែនចាក់សាំងទៅលើភ្លើង ដែលធ្វើឲ្យស្ថានការណ៍កាន់តែតានតឹងឡើងនោះទេ៕

ប្រែសម្រួល៖ Vann Vann

ប្រភព៖ CGTN

ចុចអាន៖ មេទ័ពរុស្ស៊ីម្នាក់ទៀត ដែលមានបទពិសោធន៍សង្គ្រាមជោកជាំ ត្រូវស្លាប់ក្នុងសមរភូមិ