ព័ត៌មានអន្ដរជាតិ

កុមារជាង១លាននាក់ភៀសខ្លួននៅអ៊ុយក្រែនតាំងពីសង្គ្រាមផ្ទុះឡើង

បានផុស

៣ years មុន

នៅ

ថ្ងៃព្រហស្បតិ៍ ១០ មីនា ២០២២

ដោយ

ប្រមុខអង្គការ UNICEF បានឲ្យដឹងនៅថ្ងៃទី៩ ខែមីនាថា កុមារជាង១លាននាក់ហើយបានភៀសខ្លួនចេញពីប្រទេសអ៊ុយក្រែនទៅកាន់ប្រទេសជិតខាងក្នុងរយៈពេលមិនដល់ពីរសប្តាហ៍ផង ចាប់តាំងពីរុស្ស៊ីបានចាប់ផ្តើមវាយប្រហារនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយក លោកស្រី Catherine Russell បាននិយាយក្នុងសេចក្តីថ្លែងការណ៍មួយថា យ៉ាងហោចណាស់កុមារ៣៧នាក់ត្រូវបានសម្លាប់ និង៥០នាក់របួស។

លោកស្រីបានលើកឡើងថា លោកស្រីរន្ធត់ចំពោះការវាយប្រហារដែលរាយការណ៍ពីមន្ទីរពេទ្យកុមារមួយនៅទីក្រុង Mariupol ប្រទេសអ៊ុយក្រែនដែលមន្ត្រីបាននិយាយថា ការវាយប្រហារតាមផ្លូវអាកាសរបស់រុស្ស៊ីបានធ្វើឲ្យកប់អ្នកជំងឺនៅក្រោមអគារបាក់បែក ទោះជាមានបទឈប់បាញ់គ្នាត្រូវបានឯកភាពក៏ដោយ។

«ប្រសិនបើត្រូវបានបញ្ជាក់ ការវាយប្រហារនេះបង្ហាញពីតួលេខស្លាប់គួរឲ្យរន្ធត់ដែលសង្គ្រាមត្រូវបានគេរំពឹងលើកុមារ និងក្រុមគ្រួសាររបស់អ៊ុយក្រែន»។ លោកស្រី Russell បានលើកឡើង។

ការទម្លាក់គ្រាប់បែកដែលប្រធានាធិបតីអ៊ុយក្រែនលោក Volodymyr Zelenskyy បានហៅ«ភាពសាហាវឃោរឃៅ»បានកើនឡើង ទោះជាមានបទឈប់បាញ់គ្នាដែលបានព្រមព្រៀងដើម្បីឲ្យជនស៊ីវិលរាប់ម៉ឺននាក់ដែលជាប់គាំងក្នុងទីក្រុងអាចចាកចេញបាន។

ក្រុមប្រឹក្សាទីក្រុង Mariupol បាននិយាយថា មន្ទីរពេទ្យត្រូវបានវាយប្រហារជាច្រើនដងដោយការវាយប្រហារផ្លូវអាកាសបណ្តាលឲ្យបំផ្លិចបំផ្លាញ។ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ៖«កម្លាំងរុស្ស៊ីមិនបាញ់លើគោលដៅជនស៊ីវិលឡើយ»។

មនុស្សជាង២លាននាក់បានភៀសខ្លួនចេញពីអ៊ុយក្រែនចាប់តាំងពីលោកប្រធានាធិបតីរុស្ស៊ី វ្លាឌីមៀរ ពូទីន បានបញ្ជាឲ្យមានប្រតិបត្តិការយោធាពិសេសកាលពីថ្ងៃទី២៤ ខែកុម្ភៈ។

ភាគច្រើននៃអ្នកភៀសខ្លួនទាំងនោះគឺជាស្ត្រី និងកុមារ ខណៈបុរសដែលមានសមត្ថភាពត្រូវបានរដ្ឋាភិបាលក្រុងកៀវបញ្ជាឲ្យស្ថិតនៅក្នុងប្រទេសដើម្បីប្រយុទ្ធ៕

ប្រែសម្រួល៖ វីរបុត្រ
ប្រភព៖ Reuters

Related Topics:ជនភៀសខ្លួន