ព័ត៌មានអន្ដរជាតិ

អ្នកចរចា ៖«រុស្ស៊ី និងអ៊ុយក្រែនជិតឈានដល់កិច្ចព្រមព្រៀងហើយ»

បានផុស

៣ years មុន

នៅ

ថ្ងៃចន្ទ ១៤ មីនា ២០២២

ដោយ

សមាជិកម្នាក់នៃគណៈប្រតិភូចរចារុស្ស៊ី លោក Leonid Slutsky បាននិយាយថា លោកជឿលើវិឌ្ឍភាពដ៏សំខាន់ដោយលោកបានកត់សំគាល់នៅក្នុងកិច្ចពិភាក្សារវាងទីក្រុងមូស្គូ និងទីក្រុងកៀវប្រហែលជានាំភាគីទាំងពីរឈានទៅចុះហត្ថលេខាលើកិច្ចព្រមព្រៀងឆាប់ៗ។

និយាយទៅកាន់កាសែត RT Arabic កាលពីថ្ងៃអាទិត្យ លោក Slutsky ដែលជាប្រធានគណៈកម្មាធិការកិច្ចការអន្តរជាតិរបស់រដ្ឋ Duma មានប្រសាសន៍ថា ៖«ប្រសិនបើយើងប្រៀបធៀបគោលជំហររបស់គណៈប្រតិភូទាំងពីរនៅកិច្ចពិភាក្សា តាំងពីដំបូង និងថ្ងៃនេះ យើងឃើញវឌ្ឍនភាពដ៏សំខាន់»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ៖«ផ្អែកលើការរំពឹងទុកផ្ទាល់ខ្លួន ខ្ញុំសប្បាយចិត្តចំពោះរបាយការណ៍ដែលថា ពីរបីថ្ងៃខាងមុខ វឌ្ឍនភាពនេះប្រហែលជាអភិវឌ្ឍទៅជាគោលជំហររួមគ្នានៃគណៈប្រតិភូ និងឈានចូលទៅចុះហត្ថលេខាលើឯកសារ»។

លោក Slutsky បានសង្កត់ធ្ងន់ថា ការចុះហត្ថលេខាលើឯកសារដូចនេះគឺ«ជាបញ្ហានៃសារៈសំខាន់បំផុត» ខណៈវានឹងផ្តល់«មូលដ្ឋានគ្រឹះមួយនៃការកាត់បន្ថយការកើនឡើង និងសង្គ្រោះជីវិតមនុស្សដែលកំពុងស្លាប់ថ្ងៃនេះ»។

ចំណែកភាគីអ៊ុយក្រែនក៏បានកត់សំគាល់ចំពោះវឌ្ឍនភាពនៃការចរចាដែរ។ ជំនួយការប្រធានាធិបតីអ៊ុយក្រែន លោក Mikhail Podolyak បាននិយាយក្នុងបទសម្ភាសជាមួយកាសែតរុស្ស៊ី Kommersant ថា ភាគីទាំងពីរបានឈានដល់ការសម្របសម្រួលមួយ។

លោកថា ៖«ភាគីរុស្ស៊ីកំពុងមើលឃើញអ្វីកាន់តែគ្រប់គ្រាន់ តែវាត្រូវការពេលវេលាខ្លះទៀត មុនពេលសម្រេច១០០% ដើម្បីយល់ពីស្ថានភាពច្បាស់លាស់»។

លោក Podolyak បានបន្តថា លោកឃើញកិច្ចព្រមព្រៀងមួយរវាង ទីក្រុងកៀវ និងមូស្គូកំពុងត្រូវបានបង្កើតទម្រង់នៃឯកសារពហុសមាសធាតុ៕

ប្រែសម្រួល៖ វីរបុត្រ
ប្រភព៖ RT