លោក ត្រាំ ថា ការលុកលុយរបស់ រុស្ស៊ី លើ អ៊ុយក្រែន ពិតជាអាចកើត សង្គ្រាមលោកលើកទី ៣

អតីតប្រធានាធិបតីអាមេរិកលោក ដូណាល់ ត្រាំ បាននិយាយកាលពីថ្ងៃអាទិត្យថា ស្ថានភាពនៅអ៊ុយក្រែននឹងកាន់តែអាក្រក់ទៅៗ ដោយអះអាងថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងមិនបញ្ឈប់សង្គ្រាមរបស់គាត់ឡើយ ។

លោក ត្រាំ បាន​និយាយ ​អំឡុង​ពេល​ជួប​ជុំ​គ្នា​នៅ​រដ្ឋ South Carolina ថា​ “​នេះ​អាច​នាំ​ឲ្យ​មាន​សង្គ្រាម​លោក​លើក​ទី ៣ ។ ខ្ញុំឃើញអ្វីដែលកំពុងកើតឡើង ពីព្រោះប្រសិនបើអ្នកគិតថា ពូទីន នឹងឈប់ វានឹងកាន់តែអាក្រក់ទៅៗ ។ គាត់នឹងមិនទទួលយកវាទេ ហើយយើងក៏មិនមាននរណាម្នាក់ហ៊ាននិយាយជាមួយគាត់ដែរ” ។

ក្នុងអំឡុងពេលថ្លែងសុន្ទរកថារបស់គាត់ អតីតប្រធានាធិបតីរូបនេះបានផ្តោតលើរដ្ឋបាលបច្ចុប្បន្នរបស់លោក ចូ បៃដិន ហើយបានរំលឹកឡើងវិញថា លោក ពូទីន មិនដែលមានសង្រ្គាម ក្នុងអំឡុងលោកកាន់តំណែងប្រធានាធិបតីអាមេរិកនោះទេ ។ គ្មាននរណាម្នាក់ធ្លាប់តឹងរ៉ឹងលើប្រទេសរុស្ស៊ីជាងខ្ញុំទេ ។

ចាប់តាំងពីរុស្ស៊ីបានចាប់ផ្តើមសង្រ្គាមរបស់ខ្លួនលើអ៊ុយក្រែនកាលពីថ្ងៃទី ២៤ ខែកុម្ភៈ មនុស្សជាង ២.៥ លាននាក់បានភៀសខ្លួនទៅកាន់ប្រទេសផ្សេងទៀត និងប្រហែល ២ លាននាក់ទៀតបានផ្លាស់ទីលំនៅនៅក្នុងប្រទេស ។

បើយោងតាមការប៉ាន់ស្មានរបស់អង្គការសហប្រជាជាតិ (UN) បានឲ្យដឹងថា យ៉ាងហោចណាស់ជនស៊ីវិល ៥៧៩ នាក់បានស្លាប់ និង ១,០០២ នាក់បានរងរបួសផងដែរនៅក្នុងអ៊ុយក្រែន ។

ខណៈពេលដែលសហភាពអឺរ៉ុប សហរដ្ឋអាមេរិក និងអ្នកផ្សេងទៀតបានដាក់ទណ្ឌកម្មលើទីក្រុងមូស្គូ ក្រុមហ៊ុន និងម៉ាកយីហោពិភពលោកជាច្រើនក៏បានផ្អាកប្រតិបត្តិការនៅក្នុងប្រទេសរុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ្នកកាសែត អាមេរិក ម្នាក់ត្រូវបាញ់សម្លាប់ ពេលយកព័ត៌មាននៅ អ៊ុយក្រែន