អ្នកកាសែត Fox ២នាក់ ត្រូវសម្លាប់នៅ អ៊ុយក្រែន (មានវីដេអូ)

អ្នកថតវីដេអូជើងចាស់ម្នាក់ និងអ្នកកាសែតអ៊ុយក្រែនអាយុ២៤ឆ្នាំម្នាក់ ដែលធ្វើការឲ្យសារ័ត៌មាន Fox News ត្រូវបានសម្លាប់ នៅពេលរថយន្តរបស់ពួកគេរងការវាយប្រហារ ខាងក្រៅទីក្រុង កៀវ។

នៅពេលកើតហេតុ លោក Pierre Zakrzewski អាយុ ៥៥ ឆ្នាំ និងលោកស្រី Oleksandra Sasha Kuvshynova កំពុងធ្វើដំណើរក្នុងទីក្រុង Horenka ជាមួយអ្នកយកព័ត៌មាន Fox News ម្នាក់ទៀតឈ្មោះ Benjamin Hall ដែលត្រូវរបួស បច្ចុប្បន្នកំពុងសម្រាកព្យាបាលនៅមន្ទីរពេទ្យ។

នាយកប្រតិបត្តិ Fox News លោកស្រី Suzanne Scott បាននិយាយថា “ថ្ងៃនេះជាថ្ងៃដ៏ក្រៀមក្រំសម្រាប់ Fox News Media និងសម្រាប់អ្នកកាសែតទាំងអស់ ដែលប្រថុយជីវិតដើម្បីយកព័ត៌មាន”។

កាលពីថ្ងៃអាទិត្យ អ្នកផលិតភាពយន្តឯកសារ Brent Renaud ដែលអ្នកយកព័ត៌មានសង្គ្រាមជើងចាស់ម្នាក់ទៀត បានស្លាប់ នៅពេលកងកម្លាំងរុស្ស៊ីបើកការបាញ់ប្រហារទៅលើរថយន្តរបស់គាត់ក្នុងទីក្រុង Irpin ដែលក៏ស្ថិតនៅខាងក្រៅទីក្រុង កៀវ ដែរ។

ការស្លាប់របស់អ្នកកាសែតទាំង៣ក្នុងរយៈពេលដ៏ខ្លី បានគូសបញ្ជាក់អំពីគ្រោះថ្នាក់ដែលមនុស្សត្រូវប្រឈមមុខនឹងសង្រ្គាមរ៉ាំរ៉ៃក្នុងប្រទេសអ៊ុយក្រែន សូម្បីតែអ្នកមានបទពិសោធន៍ច្រើនក្នុងការរាយការណ៍ពីតំបន់ជម្លោះក៏ដោយ។

គួរបញ្ជាក់ថា លោក Zakrzewski គឺជាជនជាតិអៀរឡង់ រស់នៅទីក្រុងឡុងដ៍នៃប្រទេស អង់គ្លេស។ លោកធ្លាប់ផ្សាយព័ត៌មានអំពីជម្លោះនៅក្នុងប្រទេសអ៊ីរ៉ាក់ អាហ្វហ្គានីស្ថាន និងស៊ីរីឲ្យក្រុមហ៊ុន Fox ហើយបានឈ្នះពានរង្វាន់ “Unsung Hero” សម្រាប់ការដើរតួនាទីយ៉ាងសំខាន់កាលពីឆ្នាំមុន ក្នុងការនាំអ្នកធ្វើការក្រៅម៉ោងរបស់ Fox និងក្រុមគ្រួសាររបស់ពួកគេចេញពីប្រទេសអាហ្វហ្គានីស្ថាន បន្ទាប់ពី អាមេរិកដកទ័ពអាមេរិក។

គាត់បានធ្វើការនៅប្រទេស អ៊ុយក្រែន ចាប់តាំងពីខែកុម្ភៈមក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ AP

ចុចអាន៖ សង្គ្រាមរុស្ស៊ី-អ៊ុយក្រែន កំពុងធ្វើបាបប្រទេសក្រីក្រ ដោយសារតម្លៃទំនិញឡើងថ្លៃ