ថៃ តាមរកមុខអ្នក​បង្ហោះ​រូប​ Lisa កាន់ដប​ស្រា​នៅលើ​ផេក BLACKPINK ​មកដោះស្រាយតាមផ្លូវច្បាប់

លោក Niphon Chinanonwet ប្រធានការិយាល័យត្រួតពិនិត្យគ្រឿងស្រវឹង នៃនាយកដ្ឋានគ្រប់គ្រងជំងឺ បាននិយាយនៅថ្ងៃពុធ ទី១៦ ខែមីនា នេះថា ការិយាល័យរបស់លោកកំពុងចាត់មន្ត្រីឱ្យស្វែងរកមុខអ្នកដែលបង្ហោះរូបថត និងសារនៅលើផេក BLACKPINK ថៃ មកដោះស្រាយចំពោះមុខច្បាប់។

សេចក្ដីប្រកាសនេះបានកើតឡើងបន្ទាប់ពីផេក BLACKPINK របស់ថៃ បានបង្ហោះរូបថតរបស់សិល្បការិនីជនជាតិថៃ Lisa Manoban សមាជិកក្រុម BLACKPINK កាន់ដប និងកែវមានជាតិអាល់កុល ដើម្បីអបអរសាទរតារារូបនេះក្នុងការក្លាយខ្លួនជាឯកអគ្គរាជទូតម៉ាកយីហោស្រាវីស្គី Chivas ប្រចាំអាស៊ី ដំបូងបំផុត។

ប្រធាន​ការិយាល័យ​ត្រួតពិនិត្យ​គ្រឿង​ស្រវឹងរូបនេះ បន្តថា ការបង្ហោះនេះត្រូវបានចាត់ទុកជាការបំពានច្បាប់របស់ប្រទេស ព្រោះថៃមានច្បាប់គ្រប់គ្រងការផ្សាយពាណិជ្ជកម្មគ្រឿងស្រវឹងយ៉ាងតឹងរ៉ឹង។ នៅក្នុងមាត្រា ៣២នៃច្បាប់គ្រប់គ្រងភេសជ្ជៈមានជាតិស្រវឹង បានបញ្ជាក់ថា ការដាក់ស្លាកយីហោភេសជ្ជៈមានជាតិអាល់កុល រួមទាំងការវេចខ្ចប់ជាតិអាល់កុលផ្សព្វផ្សាយក្ដី សុទ្ធតែត្រូវបានហាមឃាត់។

លោក Niphon Chinanonwet បញ្ចប់ថា ការិយាល័យរបស់ខ្លួននឹងធ្វើលិខិតកោះហៅបុគ្គលពាក់ព័ន្ធមកបំភ្លឺបន្ថែម តាមនិតិវិធីច្បាប់៕

ប្រែសម្រួល៖ ​សន្យា

ចុចអាន៖ Lisa​ ក្លាយជាស្ត្រីអាស៊ីដំបូងគេ របស់ទូតឆន្ទៈ ស្រាវីស្គី Chivas

ចុចអាន៖ មន្រ្តីជំនាញ ទម្លាយ​ដំណើរ​ការ​ធ្វើ​កោសល្យវិច្ច័យសព​ Tangmo លើកទី២