ព័ត៌មានអន្ដរជាតិ

លោក ស៊ី ប្រាប់លោក បៃដិន ថា ដោះស្រាយបញ្ហាតៃវ៉ាន់មិនល្អនឹងប៉ះពាល់ដល់ទំនាក់ទំនងចិន-អាមេរិក

បានផុស

៣ years មុន

នៅ

ថ្ងៃសៅរ៍ ១៩ មីនា ២០២២

ដោយ

ប្រធានាធិបតីចិន លោក ស៊ី ជិនពីង បានប្រាប់ប្រធានាធិបតីអាមេរិក លោក ចូ បៃដិន កាលពីថ្ងៃសុក្រ ទី១៨ ខែមីនាថា បញ្ហានៅកោះតៃវ៉ាន់ត្រូវការដោះស្រាយឲ្យបានល្អដើម្បីជៀសវាងផលប៉ះពាល់អវិជ្ជមានលើទំនាក់ទំនងចិន-អាមេរិក។

ចិនបាននិយាយថា កោះតៃវ៉ាន់គឺជាបញ្ហាដ៏រសើប និងសំខាន់បំផុតនៅក្នុងទំនាក់ទំនងរបស់ខ្លួនជាមួយសហរដ្ឋអាមេរិក។ ទីក្រុងវ៉ាស៊ីនតោនដែលកំពុងស្វែងការជួយពីទីក្រុងប៉េកាំងដើម្បីស្តារសន្តិភាពនៅអ៊ុយក្រែន បន្ទាប់ពីរុស្ស៊ីវាយប្រហារកាលពីថ្ងៃទី២៤ ខែកុម្ភៈ មិនមានទំនាក់ទំនងការទូតផ្លូវការជាមួយទីក្រុងតៃប៊ិទេ ប៉ុន្តែជាអ្នកគាំទ្រ និងជាអ្នកផ្គត់ផ្គង់អាវុធអន្តរជាតិដ៏សំខាន់បំផុតរបស់តៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ី បានប្រាប់លោក បៃដិន តាមការហៅវីដេអូថា ៖«បុគ្គលមួយចំនួននៅសហរដ្ឋអាមេរិកកំពុងផ្ញើសញ្ញាមិនត្រឹមត្រូវទៅកងកម្លាំងគាំទ្រឯករាជ្យនៅកោះតៃវ៉ាន់ ហើយនោះពិតជាគ្រោះថ្នាក់ណាស់»។

«ប្រសិនបើបញ្ហាកោះតៃវ៉ាន់មិនត្រូវបានដោះស្រាយឲ្យល្អប្រសើរទេ វានឹងជះឥទ្ធិពលដ៏អាក្រក់ដល់ទំនាក់ទំនងរបស់ប្រទេសទាំងពីរ»។

សេចក្តីថ្លែងការណ៍របស់សេតវិមានមួយបាននិយាយថា លោក បៃដិន បានរម្លឹកឡើងវិញក្នុងការហៅវីដេអូជាមួយលោក ស៊ី ថា គោលនយោបាយអាមេរិកលើកោះតៃវ៉ាន់មិនប្រែប្រួលទេ និងបានសង្កត់ធ្ងន់ថា ទីក្រុងវ៉ាស៊ីនតោនបន្តប្រឆាំងនឹងការប្រែប្រួលឯកតោភាគីណាមួយចំពោះស្ថានភាពដដែល។

លោក ស៊ី បានប្រាប់លោក បៃដិន ថា ៖«យើងខ្ញុំសង្ឃឹមថា ភាគីអាមេរិកនឹងយកចិត្តទុកដាក់ឲ្យបានពេញលេញចំពោះបញ្ហានេះ»។

យោងតាមសារព័ត៌មានរដ្ឋចិនបានផ្សាយថា លោកប្រធានាធិបតីចិនក៏បានប្រាប់លោក ចូ បៃដិន ទៀតថា សង្គ្រាមនៅអ៊ុយក្រែនត្រូវតែបញ្ឈប់ឲ្យបានឆាប់បំផុតតាមដែលទៅរួច។

មេដឹកនាំចិនបានបន្ថែមថា ភាគីទាំងអស់ត្រូវតែចូលរួមគាំទ្រកិច្ចចរចារុស្ស៊ី-អ៊ុយក្រែន ខណៈសហរដ្ឋអាមេរិក និងអង្គការណាតូត្រូវតែអនុវត្តកិច្ចពិភាក្សាជាមួយរុស្ស៊ីដើម្បីដោះស្រាយបញ្ហានៃវិបត្តិនៅអ៊ុយក្រែន៕

ប្រែសម្រួល៖ វីរបុត្រ
ប្រភព៖ Reuters

Related Topics:សហរដ្ឋអាមេរិក