រុស្ស៊ី​ បាញ់មីស៊ីលល្បឿនលឿនជាងសំឡេងមួយគ្រាប់ទៀតលើ អ៊ុយក្រែន (មានវីដេអូ)

រុស្ស៊ីនិយាយថា ខ្លួនបានបើកការវាយប្រហារដោយកាំជ្រួចមីស៊ីលល្បឿនលឿនជាងសំឡេងលើអ៊ុយក្រែនរយៈពេល ២ ថ្ងៃជាប់ៗគ្នា ចំពេលមានការអះអាងថា មនុស្សរាប់ពាន់នាក់ដែលជាប់នៅក្នុងទីក្រុងឡោមព័ទ្ធត្រូវបាន “និរទេសដោយបង្ខំ” ទៅកាន់ទឹកដីរុស្ស៊ី ។

មន្ត្រីក្រសួងការពារជាតិរុស្ស៊ីបាននិយាយថា អាវុធដែលគេស្គាល់ថាជា មីស៊ីល Kinzhal បានវាយប្រហារឃ្លាំងផ្ទុកឥន្ធនៈរបស់អ៊ុយក្រែននៅជិតកំពង់ផែសមុទ្រខ្មៅ Mykolaiv ។

វាជាថ្ងៃទី ២ ជាប់ៗគ្នាដែលរុស្ស៊ីបានប្រើកាំជ្រួចមីស៊ីលដែលមានសមត្ថភាពវាយប្រហារគោលដៅចម្ងាយ ២,០១១ គីឡូម៉ែត្រក្នុងល្បឿនលឿនជាងសំឡេង ១០ ដង ។

ចំណែកនៅក្នុងការវាយប្រហារដាច់ដោយឡែក សាលាសិល្បៈមួយដែលមានមនុស្ស ៤០០ នាក់កំពុងជ្រកកោនក្នុងទីក្រុង Mariupol ត្រូវបានបំផ្លាញ ហើយអាជ្ញាធរនៅទីក្រុង Kharkiv បាននិយាយថា យ៉ាងហោចណាស់ជនស៊ីវិល ៥ នាក់ រួមទាំងក្មេងប្រុសអាយុ ៩ ឆ្នាំម្នាក់ត្រូវបានសម្លាប់ដោយការបាញ់ផ្លោងរបស់រុស្ស៊ី ។

ក្រុមប្រឹក្សាក្រុងបាននិយាយថា មនុស្សកំពុងជាប់នៅក្រោមគំនរបាក់បែកនៃអគារសិក្សានៅទីក្រុង Mariupol ប៉ុន្តែមិនមានព័ត៌មានភ្លាមៗអំពីចំនួនអ្នកស្លាប់ និងរបួសនោះទេ ។

ទន្ទឹមនោះប្រធានាធិបតីអ៊ុយក្រែនលោក Volodymyr Zelenskyy បាននិយាយថា ការឡោមព័ទ្ធទីក្រុង Mariupol ជាកន្លែងដែលមនុស្សរាប់សែននាក់ជាប់គាំង និងប្រឈមមុខនឹងការទម្លាក់គ្រាប់បែកឥតឈប់ឈរ គឺជាភេរវកម្មដែលនឹងត្រូវចងចាំជាច្រើនសតវត្សទៅមុខទៀត ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ រុស្ស៊ី បាញ់មីស៊ីលលឿនជាងសំឡេង កម្ទេចឃ្លាំងអាវុធ អ៊ុយក្រែន (មានវីដេអូ)