ទាហានវ័យក្មេង អង់គ្លេស ត្រូវចាប់ខ្លួន ក្រោយទៅប្រយុទ្ធនៅ អ៊ុយក្រែន

កាសែត The Sun បានរាយការណ៍កាលពីថ្ងៃអាទិត្យថា ទាហានអាយុ ១៩ ឆ្នាំម្នាក់ជាមួយនឹងវរជន Coldstream Guard ត្រូវបានចាប់ខ្លួនដោយប៉ូលិសអង់គ្លេស បន្ទាប់ពីគាត់ត្រលប់មកពីប្រទេសអ៊ុយក្រែនវិញ ។

ទាហានរូបនេះបានទៅតំបន់គ្មានយោធាកាលពី ២ សប្តាហ៍មុនដើម្បីចូលរួមជាមួយកងពលអន្តរជាតិការពារទឹកដីរបស់ប្រទេសអ៊ុយក្រែន ដែលប្រមូលផ្តុំអ្នកប្រយុទ្ធបរទេសដែលមានបំណងចង់ប្រយុទ្ធជាមួយកងទ័ពរុស្ស៊ី ។

យោងទៅតាមសារព័ត៌មានខាងលើបានឲ្យដឹងថា ការត្រឡប់មកវិញរបស់ទាហានវ័យ ១៩ ឆ្នាំ ដោយសារតែមានការធុញទ្រាន់ជាមួយនឹងតួនាទីក្នុងកងវរសេនាធំរបស់គាត់ ហើយចង់ឃើញសកម្មភាពជាក់ស្តែងមួយចំនួន ។

ទាហានរូបនេះបានប្រៀបធៀបសកម្មភាពនេះទៅនឹងប្រទេសអាហ្វហ្គានីស្ថានអំពីការដកទ័ពសម្ព័ន្ធលោកខាងលិចយ៉ាងលឿនចេញពីប្រទេសនោះកាលពីឆ្នាំមុន ។

កាសែតបានរាយការណ៍ថា ទាហានរូបនេះបានជ្រើសរើសការវិលត្រឡប់ទៅប្រទេសអង់គ្លេសវិញ បន្ទាប់ពីថ្នាក់លើរបស់គាត់ និងមិត្តរួមក្រុមប្រយុទ្ធអង់គ្លេសបានព្យាយាមបញ្ចុះបញ្ចូលគាត់ថា ពេលដែលគាត់ស្នាក់នៅតំបន់គ្មានយោធាយូរនោះ វានឹងកាន់តែអាក្រក់ ក៏ដូចជាផលប៉ះពាល់ដែលអាចកើតមានចំពោះគាត់ ។

ទន្ទឹមនោះ ឆ្មាំទាហាន​សកម្ម​ ៣ ​នាក់​ផ្សេង​ទៀត​ដែល​ទៅ​ប្រទេសអ៊ុយក្រែនជាមួយ​គាត់​ត្រូវ​បាន​គេ​ជឿ​ថា​នៅ​តែស្ថិត​ក្នុង​ប្រទេសអ៊ុយក្រែននៅឡើយ ។

គួរបញ្ជាក់ថា វាកើតឡើងតែប៉ុន្មានថ្ងៃប៉ុណ្ណោះ បន្ទាប់ពីលោក Jake Priday ដែលជាគ្រូបង្រៀន និងជាអតីតយុទ្ធជនអង់គ្លេសបានចាកចេញពីប្រទេសអ៊ុយក្រែន ក្រោយបម្រើការជាទាហានស៊ីឈ្នួលបានត្រឹម ៩ ម៉ោង ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ទាហានស៊ីឈ្នួល អង់គ្លេស ចេញពី អ៊ុយក្រែន ក្រោយបម្រើការបានត្រឹម ៩ ម៉ោង