លក្ខណៈពិសេសមីស៊ីលល្បឿនលឿនជាងសំឡេងរបស់ រុស្ស៊ី ដែលបាញ់ផ្ទួនៗលើ អ៊ុយក្រែន

រយៈពេល ២ ថ្ងៃជាប់ៗគ្នាដែលរុស្ស៊ីបានបើកការវាយប្រហារដោយកាំជ្រួចមីស៊ីលល្បឿនលឿនជាងសំឡេងលើទីតាំងមួយចំនួនរបស់អ៊ុយក្រែន ។

មីស៊ីលល្បឿនលឿនជាងសំឡេងដែលមានឈ្មោះថា Kinzhal កាលពីថ្ងៃទី ១៨ ខែមីនាបានកម្ទេចឃ្លាំងអាវុធនៅជិតទីក្រុង Ivano-Frankivsk ភាគខាងលិចអ៊ុយក្រែន ។ នៅថ្ងៃបន្ទាប់មីស៊ីលដ៏ទំនើបបំផុតរបស់រុស្ស៊ីបានវាយប្រហារឃ្លាំងផ្ទុកឥន្ធនៈនៅជិតកំពង់ផែសមុទ្រខ្មៅ Mykolaiv ។

មីស៊ីល Kinzhal ត្រូវបានរចនាឡើងដើម្បីវាយប្រហារនាវាចម្បាំងរបស់អង្គការណាតូដែលបង្កការគំរាមកំហែងដល់ប្រព័ន្ធមីស៊ីលយុទ្ធសាស្ត្រនៅអឺរ៉ុប និងបំផ្លាញប្រព័ន្ធការពារកាំជ្រួចមីស៊ីល នាវាការពារមីស៊ីលផ្លោង និងឧបករណ៍បាញ់ពីដីផ្សេងទៀតរបស់អង្គការណាតូនៅជិតព្រំដែនរុស្ស៊ី ។

វាក៏ត្រូវបានរចនាឡើងដើម្បីយកឈ្នះប្រព័ន្ធការពារដែនអាកាស ឬមីស៊ីលរបស់សហរដ្ឋអាមេរិករួមទាំង MIM-104 Patriot ប្រព័ន្ធ THAAD និងប្រព័ន្ធប្រយុទ្ធ Aegis ជាដើម ។

ចំណែករយៈចម្ងាយរបស់មីស៊ីលនេះគឺ ២,០០០ គីឡូម៉ែត្រ ឬក្នុងល្បឿន Mach 10 នៅពេលដឹកដោយយន្តហោះ MiG-31K និង ៣,០០០ គីឡូម៉ែត្រ នៅពេលដឹកដោយយន្តហោះ Tu-22M3 ។

Kinzhal គឺជាកាំជ្រួចមីស៊ីលផ្លោងល្បឿនលឿនជាងសំឡេងរបស់រុស្ស៊ីដែលមានសមត្ថភាពនុយក្លេអ៊ែរ ។ វាអាចផ្ទុកទាំងក្បាលគ្រាប់ធម្មតា និងនុយក្លេអ៊ែរទម្ងន់រហូតដល់ ៥០០ គីឡូក្រាម ហើយ​ត្រូវ​បាន​គេ​ដាក់​ពង្រាយ​នៅ​មូលដ្ឋាន​ទ័ព​អាកាស Southern Military District និង Western Military District របស់រុស្ស៊ី ។

Kinzhal បានដាក់ដំណើរការក្នុងខែធ្នូ ឆ្នាំ ២០១៧ ហើយជាអាវុធយុទ្ធសាស្ត្រថ្មីមួយក្នុងចំណោមអាវុធយុទ្ធសាស្ត្រថ្មីទាំង ៦ របស់រុស្ស៊ី ដែលបានបង្ហាញដោយប្រធានាធិបតីរុស្ស៊ីលោក វ្ល៉ាឌីមៀ ពូទីន នៅថ្ងៃទី ១ ខែមីនា ឆ្នាំ ២០១៨ ។ មីស៊ីលនេះត្រូវបានគេរាយការណ៍ថាបានប្រើប្រាស់ជាលើកដំបូងក្នុងឆ្នាំ ២០១៦ ក្នុងអំឡុងពេលយុទ្ធនាការយោធារបស់រុស្ស៊ីនៅក្នុងប្រទេសស៊ីរី ៕

ប្រែសម្រួលដោយ ៖ ជីវ័ន្ត

ប្រភព ៖ Wikipedia

ចុចអាន ៖ មីស៊ីលលឿនជាងសំឡេង រុស្ស៊ី សម្លាប់ទ័ពអ៊ុយក្រែន និងទាហានស៊ីឈ្នួល ជាង ១០០ នាក់ (មានវីដេអូ)

ចុចអាន ៖ ទាហានស៊ីឈ្នួល អង់គ្លេស ចេញពី អ៊ុយក្រែន ក្រោយបម្រើការបានត្រឹម ៩ ម៉ោង