មីយ៉ាន់ម៉ា បដិសេធការចោទប្រកាន់របស់អាមេរិកថា កងទ័ពប្រព្រឹត្តអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា

ប្រភពព័ត៌មានបានឱ្យដឹងថា រដ្ឋាភិបាលយោធាមីយ៉ាន់ម៉ាបានប្រកាសបដិសេធយ៉ាងដាច់អហង្ការចំពោះការប្រកាស
របស់សហរដ្ឋអាមេរិកកាលពីពេលថ្មីៗថា យោធាមីយ៉ាន់ម៉ាបានប្រព្រឹត្តអំពើប្រល័យពូជសាសន៍លើជនជាតិភាគតិចមូស្លីមរ៉ូហ៊ីងយ៉ា ក្នុងការសម្លាប់ក្នុងប្រទេសមីយ៉ាន់ម៉ាកាលពី ៥ឆ្នាំមុន។

សេចក្តីថ្លែងការណ៍ដែលចេញផ្សាយដោយក្រសួងការបរទេសមីយ៉ាន់ម៉ាកាលពីថ្ងៃទី២២ ខែមីនា បានថ្កោលទោសចំពោះការប្រកាសរបស់សហរដ្ឋអាមេរិកថា៖ “ប្រាសចាកពីការពិត” និងថា មីយ៉ាន់ម៉ាមិនដែលចូលរួមក្នុងអំពើប្រល័យ
ពូជសាសន៍ ហើយក៏គ្មានចេតនាប្រល័យពូជសាសន៍ដែរ ដែលបំផ្លាញជាតិទាំងមូល ឬមួយផ្នែក ជាតិសាសន៍ សាសនា ឬក្រុមផ្សេងទៀតឡើយ។

នេះគឺជាប្រតិកម្មឆ្លងតបបន្ទាប់ពីរដ្ឋាភិបាលសហរដ្ឋអាមេរិកកាលពីថ្ងៃទី២១ ខែមីនា បានប្រកាសជាផ្លូវការថា អំពើហិង្សាលើជនជាតិភាគតិចមូស្លីមរ៉ូហ៊ីងយ៉ា គឺជាអំពើប្រល័យពូជសាសន៍ និងនិយាយថា មានភស្តុតាងច្បាស់លាស់នៃការប៉ុនប៉ងសម្លាប់ជនជាតិភាគតិចមូស្លីមរ៉ូហ៊ីងយ៉ា។ ដោយរដ្ឋមន្ត្រីការបរទេសសហរដ្ឋអាមេរិកលោក Anthony Blinken បានថ្លែងពីការសម្លាប់ជនជាតិភាគតិចមូស្លីមរ៉ូហ៊ីងយ៉ារាប់ពាន់នាក់ និងបណ្តាលឱ្យមនុស្សរាប់លាននាក់ទៀតភៀសខ្លួនចេញពីប្រទេសនេះ ដោយបានសម្រេចថា សមាជិកកងទ័ពមីយ៉ាន់ម៉ាបានប្រព្រឹត្តអំពើប្រល័យពូជសាសន៍ និងប្រព្រឹត្តឧក្រិដ្ឋកម្មសង្គ្រាមប្រឆាំងមនុស្សជាតិ ប្រឆាំងនឹងជនជាតិរ៉ូហ៊ីងយ៉ា៕

ប្រែសម្រួល៖ សំអាន

ប្រភព៖ Matichon

ចុចអាន៖ រកឃើញប្រអប់ខ្មៅ ពីយន្តហោះចិន ដែលធ្លាក់