មន្ត្រីជាន់ខ្ពស់វិមានក្រឹមឡាំងទី១ លាលែងពីតំណែង ហើយចាកចេញពីរុស្ស៊ី មិនវិលមកវិញ (មានវីដេអូ)

លោក Anatoly Chubais បានលាលែងពីតំណែងជាបេសកជនពិសេសរបស់លោកប្រធានាធិបតី Vladimir Putin ហើយ ដោយលោកបានក្លាយជាមន្ត្រីជាន់ខ្ពស់ដំបូងគេ ដែលបានបំបែកខ្លួនចេញពីវិមានក្រឹមឡាំង ចាប់តាំងពីលោក Putin បើកការលុកលុយ ប្រទេសអ៊ុយក្រែនកាលពីខែមុន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់ទីភ្នាក់ងារសារព័ត៌មាន RIA Novosti កាលពីថ្ងៃពុធទី២៣ខែមីនាថា លោក Chubais ពិតជាបានលាលែងពីតំណែងមែន។

លោក Chubais ដែលធ្លាប់បម្រើការជាអគ្គសេនាធិការរបស់អតីតប្រធានាធិបតី Boris Yeltsin បានចុះចេញពីមុខតំណែង ជាអ្នកតំណាងពិសេសរបស់លោក Putin សម្រាប់ទំនាក់ទំនងជាមួយអង្គការអន្តរជាតិ។

តំណែងរបស់លោក គឺទទួលបន្ទុក សម្រេចឲ្យបាននូវគោលដៅនៃការអភិវឌ្ឍន៍ប្រកបដោយនិរន្តរភាព។

គាត់ត្រូវបានតែងតាំងក្នុងឆ្នាំ២០២០ ពោលប៉ុន្មានថ្ងៃ បន្ទាប់ពីការលាលែងពីតំណែងជាប្រធានក្រុមហ៊ុនបច្ចេកវិទ្យារដ្ឋ Rusnano ដែលគាត់បានដំណើរការតាំងពីឆ្នាំ ២០០៨មក។

យោងតាមប្រភពពីទីភ្នាក់ងារសារព័ត៌មាន Reuters បានឲ្យដឹងថា លោក Chubais ឈប់កាន់តួនាទីដោយសារតែជម្លោះនៅក្នុងប្រទេសអ៊ុយក្រែន ហើយក៏បានចាកចេញពីប្រទេសផងដែរ ដោយ​មិន​មាន​បំណងវិល​ត្រឡប់ចូល​រុស្ស៊ី​វិញនោះ​ទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ពូទីន៖ ការលក់ឧស្ម័ន ទៅឲ្យប្រទេសដែលដាក់ទណ្ឌកម្មរុស្ស៊ី នឹងត្រូវទូទាត់ជាប្រាក់ រូប