រុស្ស៊ី ថ្កោលទោស អាមេរិក ចំពោះការបញ្ឆេះសង្គ្រាមអាវុធគីមីលើ អ៊ុយក្រែន

អនុរដ្ឋមន្ត្រីការបរទេសរុស្ស៊ីលោក Sergey Ryabkov បាននិយាយថា ការអះអាងរបស់រដ្ឋាភិបាលក្រុងវ៉ាស៊ីនតោនដែលថា រុស្ស៊ីអាចប្រើប្រាស់អាវុធគីមី និងជីវសាស្រ្តលើអ៊ុយក្រែនគឺគ្មានអ្វីក្រៅពីការបំផ្លិចបំផ្លាញដោយចេតនានោះទេ ​។

លោក Ryabkov បានប្រាប់សមាជិកសភាថា “អ្វីដែលជនជាតិអាមេរិកនិយាយ គឺជាការបញ្ឆោត ។ យើងឮពួកគេគ្រប់ពេលវេលា ហើយយើងបានផ្តល់ចម្លើយយ៉ាងពេញលេញដល់ពួកគេអស់រយៈពេលជាយូរមកហើយ ។ ករណីនេះគឺថា សហរដ្ឋអាមេរិកមិនស៊ាំនឹងការស្តាប់នរណាម្នាក់ក្រៅពីខ្លួនវាផ្ទាល់ ។

អ្នកការទូតរូបនេះបានកត់សម្គាល់ថា សហរដ្ឋអាមេរិកមិនទាន់បានបំផ្លាញឃ្លាំងស្តុកអាវុធគីមីរបស់ខ្លួននៅឡើយទេ ហើយទីក្រុងវ៉ាស៊ីនតោនកំពុងពន្យារពេលដំណើរការនេះដោយក្លែងក្លាយ ។

លោក Ryabkov បានបន្ថែមថា “យើងបានសង្កត់ធ្ងន់ម្តងហើយម្តងទៀតថា វាមិនច្បាស់សម្រាប់ពួកយើងថាហេតុអ្វីបានជាសហរដ្ឋអាមេរិកយឺតយ៉ាងនៅក្នុងរបៀបពន្យាពេលការបំផ្លាញឃ្លាំងអាវុធគីមីរបស់ខ្លួន បើទោះបីជាមានធនធានទាំងបច្ចេកវិទ្យា ហិរញ្ញវត្ថុ និងផ្សេងទៀត” ។

ជាចុងក្រោយលោកបានរំលឹកថា ឃ្លាំងអាវុធគីមីទាំងមូលរបស់រុស្ស៊ីត្រូវបានបំផ្លាញទាំងស្រុងក្រោមការគ្រប់គ្រងរបស់អន្តរជាតិដ៏តឹងរឹងបំផុតកាលពីឆ្នាំ ២០១៧ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ីព្រមានថា ក្រុងមូស្គូនិងណាតូ នឹងទង្គិចគ្នាដោយផ្ទាល់ ប្រសិនបើកងរក្សាសន្តិភាព បញ្ជូនទៅអ៊ុយក្រែន