អាមេរិក និងណាតូ ថា ប្រទេសអឺរ៉ុបមួយនេះអាចចូលជួយគាំទ្រ រុស្ស៊ី ឆាប់ៗក្នុងសង្គ្រាមនៅ អ៊ុយក្រែន

មន្ត្រីសហរដ្ឋអាមេរិក និងអង្គការណាតូបានប្រាប់ CNN ថា ឆាប់ៗនេះប្រទេសបេឡារុសអាចចូលរួមជាមួយរុស្ស៊ីក្នុងសង្រ្គាមប្រឆាំងនឹងអ៊ុយក្រែន ខណៈប្រទេសនេះកំពុងចាត់វិធានការរួចទៅហើយដើម្បីធ្វើដូច្នេះ ។

មន្ត្រីយោធាណាតូម្នាក់បាននិយាយថា វាទំនងដែលប្រទេសបេឡារុសនឹងចូលទៅក្នុងជម្លោះជាមួយអ៊ុយក្រែន ខណៈប្រធានាធិបតីរុស្ស៊ីលោក វ្ល៉ាឌីមៀ ពូទីន កំពុងត្រូវការការគាំទ្រ ។

ទន្ទឹមនោះ ប្រភពពីក្រុមប្រឆាំងបេឡារុសបាននិយាយថា អង្គភាពប្រយុទ្ធរបស់បេឡារុសបានត្រៀមខ្លួនរួចជាស្រេចដើម្បីចូលទៅក្នុងប្រទេសអ៊ុយក្រែនឲ្យបានឆាប់ក្នុងរយៈពេលប៉ុន្មានថ្ងៃខាងមុខ ហើយត្រៀមដាក់ពង្រាយជាមួយនឹងកងកម្លាំងរាប់ពាន់នាក់ ។

ចំណែកមន្ត្រីស៊ើបការណ៍ជាន់ខ្ពស់ណាតូម្នាក់បាននិយាយដោយឡែកថា រដ្ឋាភិបាលបេឡារុសកំពុងរៀបចំបរិយាកាសនេះដើម្បីបង្ហាញពីភាពត្រឹមត្រូវនៃការវាយលុករបស់បេឡារុស្សប្រឆាំងនឹងអ៊ុយក្រែន ។

គួរបញ្ជាក់ថា រុស្ស៊ីបានបើកការវាយប្រហាររបស់ខ្លួនលើអ៊ុយក្រែនមួយផ្នែកពីទឹកដីរបស់ប្រទេសបេឡារុស ហើយកងទ័ពរុស្ស៊ីរាប់ពាន់នាក់បានប្រមូលផ្តុំនៅក្នុងប្រទេសបេឡារុស មុនពេលដែលវិមានក្រឹមឡាំងលុកលុយអ៊ុយក្រែនកាលពីខែមុន ខណៈដែលប្រទេសទាំងពីរបានអះអាងថាជាសមយុទ្ធហ្វឹកហ្វឺន ។

ជាការឆ្លើយតបទៅនឹងសង្គ្រាមមួយនេះ សហរដ្ឋអាមេរិក និងអឺរ៉ុបបានដាក់ទណ្ឌកម្មដោយកំណត់គោលដៅទាំងមន្ត្រីរុស្ស៊ី និងបេឡារុស រួមទាំងលោកប្រធានាធិបតី Alexander Lukashenko ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ សងសឹកវិញហើយ រុស្ស៊ី​ កំពុងបណ្ដេញមន្ត្រីការទូត អាមេរិក ចេញពីប្រទេស