ព័ត៌មានអន្ដរជាតិ

អតីតប្រធានាធិបតី កូរ៉េខាងត្បូង មួយរូបបង្ហាញមុខជាសាធារណៈ បន្ទាប់ពីជាប់ពន្ធនាគារ ៥ ឆ្នាំ

បានផុស

៣ years មុន

នៅ

ថ្ងៃព្រហស្បតិ៍ ២៤ មីនា ២០២២

ដោយ

អតីតប្រធានាធិបតីកូរ៉េខាងត្បូងលោកស្រី Park Geun-hye បានបង្ហាញខ្លួនជាសាធារណៈជាលើកដំបូងក្នុងរយៈពេល ៥ ឆ្នាំ បន្ទាប់ពីការដោះលែងពីពន្ធនាគារនៅចុងឆ្នាំ ២០២១ ក្រោយការលើកលែងទោសពីប្រធានាធិបតី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Park ត្រូវបានគេឃើញ បន្ទាប់ពីចាកចេញពីមន្ទីរពេទ្យក្នុងទីក្រុងសេអ៊ូលនៅថ្ងៃព្រហស្បតិ៍នេះ ជាទីដែលលោកស្រីកំពុងត្រូវបានសម្រាកព្យាបាលសម្រាប់បញ្ហាសុខភាពដែលមានមុនមក ។

គួររំឭកថា លោកស្រី Park ត្រូវបានដកចេញពីតំណែងក្នុងឆ្នាំ ២០១៧ ។ ក្រោយមកលោកស្រីត្រូវបានចាប់ខ្លួន និងកាត់ទោសពីបទទទួលសំណូក រួមទាំងពីក្រុមហ៊ុន Samsung Group របស់ប្រទេសផងដែរ ហើយលោកស្រីត្រូវបានកាត់ទោសឲ្យជាប់ពន្ធនាគារ ២២ ឆ្នាំ ។

លោកស្រី Park ត្រូវបានដោះលែងក្រោមការលើកលែងទោសរបស់ប្រធានាធិបតីលោក Moon Jae-in កាលពីចុងឆ្នាំមុន បន្ទាប់ពីជាប់ឃុំប្រហែល ៤ ឆ្នាំ ៩ ខែ ។

ចំណែកប្រធានាធិបតីជាប់ឆ្នោតថ្មីគឺលោក Yoon Suk-yeol ក៏បានបង្ហាញចេតនាចង់ជួបលោកស្រី Park មុនពេលចូលកាន់តំណែងនៅខែឧសភាផងដែរ ខណៈលោក Yoon ជាអ្នកដឹកនាំការស៊ើបអង្កេតពិសេសលើការចោទប្រកាន់លើលោកស្រី Park ក្នុងឋានៈជាព្រះរាជអាជ្ញា ៕