ណាតូ ជំរុញឲ្យរុស្ស៊ី បញ្ឈប់សង្គ្រាមជាបន្ទាន់ តែរុស្ស៊ី ថា ណាតូ ចង់ឲ្យសង្គ្រាមបន្ត

ក្នុងកិច្ចប្រជុំកំពូលអង្គការណាតូ នៅទីក្រុង ព្រុចសែល ប្រទេស បែលហ្សិក កាលពីម្សិលមិញ សម្ព័ន្ធភាពមួយនេះ បានចេញសេចក្តីថ្លែងការណ៍ជំរុញឲ្យប្រធានាធិបតីរុស្ស៊ីលោក វ្ល៉ាឌីមៀរ ពូទីន បញ្ឈប់សង្គ្រាមភ្លាមៗ និងដកកងកម្លាំងយោធាចេញពីប្រទេសអ៊ុយក្រែន។

សេចក្តីថ្លែងការណ៍នោះ ថែមទាំងបានអំពាវនាវឲ្យប្រទេសបេឡារុស បញ្ចប់ការពាក់ព័ន្ធរបស់ខ្លួន នៅក្នុងការវាយលុករបស់រុស្ស៊ីផងដែរ។

ទោះបីជាយ៉ាងណាក៏ដោយ ក្រសួង​ការ​បរទេស​រុស្ស៊ី​ បាន​ប្រតិកម្ម​ចំពោះ​កិច្ច​ប្រជុំ​កំពូលនេះ។

ក្រសួងនិយាយថា ការសម្រេចចិត្ត បន្តគាំទ្រដល់ទីក្រុង កៀវ បានបង្ហាញថា សម្ព័ន្ធមិត្តលោកខាងលិចចង់ឲ្យជម្លោះបន្ត។ 

នៅក្នុងសេចក្តីថ្លែងការណ៍មួយដែលផ្សាយដោយទីភ្នាក់ងារសារព័ត៌មាន Ria របស់រុស្ស៊ី, ក្រសួងបាននិយាយថា ប្រទេសលោកខាងលិចកំពុងប្រមូលផលដ៏អាក្រក់ ពីការសម្រេចចិត្តរបស់ខ្លួនក្នុងការបំពាក់អាវុធដល់អ៊ុយក្រែន ដែលបានលើកទឹកចិត្តឲ្យរដ្ឋាភិបាលទីក្រុង កៀវ ប្រើកម្លាំងប្រឆាំងនឹងក្រុមបំបែកខ្លួនគាំទ្រដោយរុស្ស៊ីនៅភាគខាងកើត អ៊ុយក្រែន៕

ប្រែសម្រួល៖ Vann Vann

ប្រភព៖ BBC

ចុចអាន៖ Joe Biden សន្យាថា សម្ព័ន្ធមិត្តលោកខាងលិចនឹងឆ្លើយតប បើ រុស្ស៊ី ប្រើប្រាស់អាវុធគីមី