ចំណុចសំខាន់ៗដែលមេដឹកនាំពិភពលោក លើកឡើងក្នុងកិច្ចប្រជុំកំពូល ណាតូ

ក្នុងកិច្ចប្រជុំកំពូលវិសាមញ្ញរបស់អង្គការណាតូនៅទីក្រុង ព្រុចសែល ប្រទេស បែលហ្សិក កាលពីថ្ងៃព្រហស្បតិ៍ទី២៤ខែមីនាឆ្នាំ២០២២ អគ្គលេខាធិការ Jens Stoltenberg បាននិយាយថា មេដឹកនាំណាតូ នឹងត្រូវដោះស្រាយវិបត្តិសន្តិសុខដ៏ធ្ងន់ធ្ងរបំផុតក្នុងមួយជំនាន់។

កិច្ចប្រជុំនេះធ្វើឡើងស្របពេលដែលពិភពលោក កំពុងប្រឈមមុខជាមួយនឹងសង្គ្រាម រុស្ស៊ី-អ៊ុយក្រែន ហើយខាងក្រោមនេះគឺជាចំណុចសំខាន់ៗដែលមេដឹកនាំកំពូលៗ លើកឡើងក្នុងកិច្ចប្រជុំកំពូលនោះ៖

លោក Joe Biden ប្រធានាធិបតីសហរដ្ឋអាមេរិក

• សហរដ្ឋអាមេរិកបានប្រកាសដាក់ទណ្ឌកម្មថ្មីលើបុគ្គល និងអង្គភាពជាង ៤០០ រួមទាំងសមាជិកសភារុស្ស៊ី មហាសេដ្ឋី និងក្រុមហ៊ុនការពារជាតិជាង ៣០០ផងដែរ

• ណាតូ មិនដែលរួបរួមគ្នាខ្លាំងជាងនេះទេ ពោលគឺផ្ទុយពីអ្វីដែលលោកប្រធានាធិបតី ពូទីន រំពឹងទុក

• ប្រសិនបើរុស្ស៊ីប្រើអាវុធគីមី អាមេរិកនឹងឆ្លើយតប ហើយទំហំនៃការឆ្លើយតបនឹងអាស្រ័យលើទំហំនៃការប្រើប្រាស់

• លោកបានបញ្ជាក់យ៉ាងច្បាស់ទៅកាន់ប្រធានាធិបតីចិន Xi Jinping ថា លោក Xi នឹងធ្វើឲ្យទំនាក់ទំនងសេដ្ឋកិច្ចរបស់គាត់ជាមួយសហរដ្ឋអាមេរិក និងសហភាពអឺរ៉ុប មានគ្រោះថ្នាក់ ប្រសិនបើគាត់ចង់ជួយរុស្ស៊ី

• អាមេរិកចង់ឃើញរុស្ស៊ីត្រូវដកចេញពីក្រុមប្រទេស G20 ប៉ុន្តែប្រសិនបើមិនអាចទៅរួច អ៊ុយក្រែនគួរតែចូលរួមជាអ្នកសង្កេតការណ៍

• ​ប្រទេស​លោក​ខាង​លិច​ត្រូវ​តែរួបរួមគ្នា​ទាំង​ស្រុង

លោក Boris Johnson នាយករដ្ឋមន្ត្រីអង់គ្លេស

• ចក្រភពអង់គ្លេសនឹងបង្កើនជំនួយដល់អ៊ុយក្រែន ក្នុងកម្រិតធំមួយ ដើម្បីជួយប្រធានាធិបតី Zelensky ការពារប្រទេសរបស់គាត់ពីការគំរាមកំហែងពីអ្នកជិតខាង

• ចក្រភពអង់គ្លេសនឹងបញ្ជូនមីស៊ីលចំនួន ៦ ០០០ គ្រាប់បន្ថែមទៀត និងថវិកា ២៥លានផោនដល់កងកម្លាំងប្រដាប់អាវុធអ៊ុយក្រែន

• នឹងមានការដាក់ពង្រាយកងទ័ពអង់គ្លេសថ្មី ទៅកាន់ប្រទេសប៊ុលហ្គារី បន្ថែមលើចំនួនទាហានអង់គ្លេសទ្វេដង ទាំងនៅក្នុងប្រទេសប៉ូឡូញ និងនៅអេស្តូនី

• ណាតូ និង G7 រួបរួមគ្នាក្នុងការប្តេជ្ញាចិត្តផ្តាច់ខ្លួនចេញពីប្រេង និងឧស្ម័នរបស់រុស្ស៊ី

• លោកបានច្រានចោលម្តងទៀត នូវតំបន់គ្មានការហោះហើរលើអ៊ុយក្រែន ដោយនិយាយថា វានឹងនាំឲ្យកងទ័ពអាកាស បាញ់ទម្លាក់យន្តហោះល្បឿនលឿនរបស់រុស្ស៊ី

• លោកមិនប្រឆាំងរុស្ស៊ីទេ ហើយអាណិតប្រជាជនរុស្ស៊ី ប៉ុន្តែមិនអាណិតលោក ពូទីន ឡើយ

• ការនិយាយអំពីការប្រើប្រាស់អាវុធនុយក្លេអ៊ែរគឺជាការរំខាន ការប្រើប្រាស់អាវុធនៅអ៊ុយក្រែនគឺជា “អំពើព្រៃផ្សៃ”

• លោកជឿថា ប្រធានាធិបតីពូទីន យល់ថា ការប្រើប្រាស់អាវុធគីមីដោយរុស្ស៊ីនឹងជា មហន្តរាយសម្រាប់គាត់

លោក Jens Stoltenberg ប្រមុខអង្គការណាតូ

• ការលុកលុយរបស់រុស្ស៊ីលើអ៊ុយក្រែនគឺជា វិបត្តិសន្តិសុខធំបំផុតក្នុងមួយជំនាន់ ហើយយើងឈររួបរួមគ្នា ដើម្បីរក្សាសម្ព័ន្ធភាពរបស់យើងឲ្យរឹងមាំ និងប្រជាជនរបស់យើងឲ្យមានសុវត្ថិភាព

• ណាតូ បានព្រមព្រៀងពង្រឹងការការពាររបស់ខ្លួន ដោយការដាក់ពង្រាយទាហាន ៤០ ០០០នាក់ ទៅកាន់ផ្នែកខាងកើតរបស់ខ្លួន ក្នុងការឆ្លើយតបទៅនឹងការវាយលុករបស់រុស្ស៊ី

• ក្រុមសមរភូមិថ្មីចំនួនបួន នឹងត្រូវបញ្ជូនទៅប្រទេសស្លូវ៉ាគី ហុងគ្រី ប៊ុលហ្គារី និងរូម៉ានី

• ការការពារតាមអ៊ីនធឺណិតកំពុងត្រូវបានពង្រឹង ហើយណាតូក៏នឹងជួយអ៊ុយក្រែនការពារខ្លួនប្រឆាំងនឹង ការគំរាមកំហែងផ្នែកជីវសាស្ត្រ គីមី វិទ្យុសកម្ម និងនុយក្លេអ៊ែរផងដែរ

• ការប្រើប្រាស់អាវុធគីមី នឹងផ្លាស់ប្តូរស្ថានភាពជម្លោះនេះទាំងស្រុង។ វានឹងក្លាយជាការរំលោភច្បាប់អន្តរជាតិយ៉ាងធ្ងន់ធ្ងរ ហើយវានឹងមានផលវិបាកធំធេង

• ការលុកលុយរបស់លោក ពូទីន លើអ៊ុយក្រែន បានផ្លាស់ប្តូរបរិយាកាសសន្តិសុខរបស់យើងសម្រាប់រយៈពេលវែង ហើយណាតូបានត្រៀមខ្លួនសម្រាប់ការធ្វើដំណើរដ៏វែងឆ្ងាយ៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី និងអ៊ុយក្រែន ដោះដូរឈ្លើយសឹក ជាលើក ដំបូង ចាប់ តាំង ពី សង្គ្រាម ផ្ទុះឡើង