លោក Macron ព្រមានថា ការបោះពាក្យសម្តីមិនប្រយ័ត្ន នឹងធ្វើឲ្យសង្រ្គាមនៅអ៊ុយក្រែន កាន់តែអាក្រក់ (មានវីដេអូ)

ប្រធានាធិបតីបារាំងលោក Emmanuel Macron បានព្រមានថា ការបោះពាក្យសម្តីមិនប្រយ័ត្ន នឹងធ្វើឲ្យសង្រ្គាមនៅអ៊ុយក្រែនកាន់តែអាក្រក់។

លោកបានព្រមានបែបនេះ​ មួយថ្ងៃបន្ទាប់ពីសមភាគីអាមេរិកលោក Joe Biden ហៅមេដឹកនាំរុស្ស៊ីលោក Vladimir Putin ថាជាអ្នកកាប់សម្លាប់ និងនិយាយថា លោកមិនគួរត្រូវបានអនុញ្ញាតឲ្យបន្តកាន់អំណាចឡើយ។

លោក Macron បាន​ប្រាប់​ប្រព័ន្ធ​ផ្សព្វផ្សាយ​បារាំង​ថា គោលដៅធំ​គឺ មាន​បទ​ឈប់​បាញ់​នៅ​អ៊ុយក្រែន ហើយ​បន្ទាប់​មក​ការ​ដក​ទ័ព​រុស្ស៊ី។ រឿងនេះ​នឹង​មិន​អាច​ទៅ​រួច​ទេ បើសិនជាមានការបោះពាក្យសម្តី ឬការធ្វើសកម្មភាពនានា ដោយមិនប្រយ័ត្ន។

ទោះបីជាយ៉ាងណាក៏ដោយ អាជ្ញាធរអាមេរិកបានបដិសេធថា លោក Biden មិនបានអំពាវនាវឲ្យមានការផ្លាស់ប្តូររបបនៅក្នុងប្រទេសរុស្ស៊ីឡើយ បន្ទាប់ពីលោកបានធ្វើការអត្ថាធិប្បាយទាំងមិនបានព្រាងទុក ក្នុងអំឡុងដំណើរទស្សនកិច្ចទៅកាន់ប្រទេសប៉ូឡូញកាលពីចុងសប្តាហ៍។

លោក Macron បានរក្សាការប្រាស្រ័យទាក់ទងជាមួយប្រធានាធិបតីរុស្ស៊ីពេញមួយវិបត្តិអ៊ុយក្រែន ហើយនិយាយថា លោកនឹងនិយាយទៅកាន់លោក Putin ក្នុងរយៈពេលពីរថ្ងៃខាងមុខ  ដើម្បីរៀបចំការជម្លៀសជនស៊ីវិលចេញពីទីក្រុងកំពង់ផែ Mariupol ដែលរងការទម្លាក់គ្រាប់បែកយ៉ាងខ្លាំង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន ត្រៀមខ្លួន ពិភាក្សា អំពី ការ អនុម័ត ឋានៈ អព្យាក្រឹត តែមានលក្ខខណ្ឌចំនួន ២