ថៃ ហាមទទួលទានគ្រឿងស្រវឹង លេងជះទឹក និងប៉ាតម្សៅ ថ្ងៃចូលឆ្នាំថ្មី

អាជ្ញាធរទីក្រុងបាងកកនៃប្រទេសថៃបានសម្រេចហាមឃាត់ការលេងប៉ាតម្សៅ និងជះទឹក ក្នុងពិធីបុណ្យសង្ក្រាន្តចូលឆ្នាំថ្មីនៅខែក្រោយនេះ ។

បន្ទាប់ពីកិច្ចប្រជុំរបស់អាជ្ញាធរ អគ្គលេខាធិការអចិន្ត្រៃយ៍នៃរដ្ឋបាលក្រុងបាងកក (BMA) លោក Khajit Chatchawanich បាននិយាយថា ការប្រារព្ធពិធីបុណ្យចូលឆ្នាំថ្មីអាចដំណើរការទៅមុខបាន ប៉ុន្តែសកម្មភាពពាក់ព័ន្ធទាំងអស់ត្រូវតែអនុវត្តតាមច្បាប់ និងបទប្បញ្ញត្តិដែលកំណត់ដោយមជ្ឈមណ្ឌលគ្រប់គ្រងស្ថានភាពជំងឺកូវីដ ១៩ (CCSA) និងចុះហត្ថលេខាដោយនាយករដ្ឋមន្ត្រី ប្រាយុទ្ធ ចាន់អូចា ។

លោក Khajit បាននិយាយថា ដើម្បីទប់ស្កាត់ការរីករាលដាលនៃជំងឺកូវីដ ១៩ កិច្ចប្រជុំបានសម្រេចចិត្តអនុញ្ញាតឲ្យតែមានពិធីស្រង់ព្រះតាមបែបប្រពៃណី ប៉ុន្តែការទទួលទានគ្រឿងស្រវឹងក្នុងទីកន្លែងរៀបចំពិធីបុណ្យសង្ក្រាន្តចូលឆ្នាំថ្មីនឹងមិនត្រូវបានអនុញ្ញាតនោះទេ ។

លោក​បាន​បន្ថែម​ថា ការលេងជះ​ទឹក ប៉ាត​ម្សៅ និងការទទួលទានគ្រឿងស្រវឹងត្រូវ​បាន​ហាម​ឃាត់​នៅ​តាម​ផ្លូវ និង​ទីសាធារណៈ​ផ្សេង​ទៀតផងដែរ ។

ចំណែកមន្ត្រី BMA បាននិយាយថា ចំនួនប្រជាជននៅក្នុងទីកន្លែងទាំងនេះត្រូវបានកំណត់ត្រឹមមនុស្សម្នាក់ប៉ុណ្ណោះក្នុង ៤ ម៉ែត្រការ៉េ ហើយអ្នកចូលរួមត្រូវតម្រូវឲ្យពាក់ម៉ាស់គ្រប់ពេលវេលា ។

ជាចុងក្រោយលោក Khajit បាននិយាយថា ក្រុមគ្រួសារអាចចូលរួមក្នុងសកម្មភាពដូចជា ការស្រោចទឹកលើដៃមនុស្សចាស់ដើម្បីបង្ហាញការគោរព និងស្វែងរកពរជ័យរបស់ពួកគេ ប៉ុន្តែការពាក់ម៉ាស់នៅតែជាកាតព្វកិច្ច ហើយមនុស្សត្រូវបានណែនាំឲ្យបដិសេធមិនចូលរួមក្នុងសកម្មភាពដែលពាក់ព័ន្ធនឹងទំនាក់ទំនងជិតស្និទ្ធទាំងអស់ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រទេសក្បែរខាង កម្ពុជា បញ្ជាក់ថ្ងៃប្រារព្ធពិធី បុណ្យចូលឆ្នាំថ្មី