ព័ត៌មានអន្ដរជាតិ

ការធ្លាក់ឧទ្ធម្ភាគចក្រនៅកុងហ្គោសម្លាប់កម្លាំងរក្សាសន្តិភាព UN ៨នាក់

បានផុស

២ years មុន

នៅ

ថ្ងៃពុធ ៣០ មីនា ២០២២

ដោយ

សមាជិក៨នាក់របស់កងកម្លាំង MONUSCO ស្ថិតក្នុងបេសកកម្មរក្សាសន្តិភាពរបស់អង្គការសហប្រជាជាតិនៅសាធារណរដ្ឋប្រជាធិបតេយ្យកុងហ្គោបានស្លាប់នៅពេលឧទ្ធម្ភាគចក្ររបស់ពួកគាត់បានធ្លាក់នៅជិតព្រំដែនប្រទេសរ្វ៉ាន់ដាកាលពីថ្ងៃអង្គារ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាកុងហ្គោបានចោទប្រកាន់ក្រុមសកម្មប្រយុទ្ធចលនា២៣មីនា (M23) ពីការបាញ់ទម្លាក់ឧទ្ធម្ភាគចក្រ ប៉ុន្តែក្រុមឧទ្ទាមបានបដិសេធ។

យោងតាមសេចក្តីថ្លែងការណ៍មួយរបស់អ្នកនាំពាក្យយោធាកុងហ្គោ លោក Sylvain Ekenge បានឲ្យដឹងថា កងកម្លាំង MONUSCO បាននិយាយថា ឧទ្ធម្ភាគចក្រប៉ាគីស្ថានដែលមានកន្ទុយលេខ៨១០កំពុងហោះហើរឈ្លបយកការណ៍លើតំបន់ Tshanzu ក្នុងខេត្ត North Kivu ជិតព្រំដែនប្រទេសរ្វ៉ាន់ដា និងអ៊ូហ្គង់ដា។ ឧទ្ធម្ភាគចក្របានធ្លាក់កាលពីថ្ងៃអង្គារ៍នៅក្នុងទឹកដីដែលគ្រប់គ្រងដោយក្រុមឧទ្ទាម M23។

បន្ថែមលើសមាជិកក្រុមប៉ាគីស្ថាន៦នាក់ ឧទ្ធម្ភាគចក្របានដឹកវរសេនីយ៍ទោជនជាតិរុស្ស៊ី Alexey Mizyura និងវរសេនីយ៍ទោសជនជាតិស៊ែប៊ី Dejan Stanojevic ដែលទាំងពីរនាក់បម្រើការនៅកងកម្លាំង MONUSCO។ យោធាប៉ាគីស្ថានបាននិយាយថា អ្នកទាំង៨នាក់បានស្លាប់ក្នុងការធ្លាក់ឧទ្ធម្ភាគចក្រ ប៉ុន្តែមិនបានបញ្ជាក់លំអិតពីមូលហេតុទេ។

អគ្គមេបញ្ជាការរងកងកម្លាំង MONUSCO លោក Benoit Chavanat បានប្រកាសកាលពីព្រឹកថ្ងៃអង្គារ៍ថា កម្លាំងអង្គការសហប្រជាជាតិមិនបានចូលរួមផ្ទាល់ក្នុងការប្រយុទ្ធប្រឆាំងនឹងក្រុមឧទ្ទាម M23 ទេ ប៉ុន្តែផ្នែកនៃអាណត្តិរបស់ខ្លួនគឺគាំទ្រយោធាកុងហ្គោដើម្បីការពារជនស៊ីវិល៕

ប្រែសម្រួល៖ វីរបុត្រ
ប្រភព៖ RT

Related Topics:អង្គការសហប្រជាជាតិ (UN)