ប្រទេសចំនួន ៣០ រួមជាមួយ អាមេរិក បញ្ចេញប្រេងរាប់សិនលានបារ៉ែល ដើម្បីឲ្យតម្លៃធ្លាក់ចុះ

ប្រធានាធិបតីអាមេរិកលោក ចូ បៃដិន បាននិយាយថា ប្រទេសចំនួន ៣០ បានចូលរួមជាមួយសហរដ្ឋអាមេរិកក្នុងការបញ្ចេញប្រេងប្រុងរបស់ពួកគេ ។

លោក បៃដិន បាននិយាយក្នុងអំឡុងសុន្ទរកថារបស់លោកពីសេតវិមានកាលពីថ្ងៃសុក្រថា “ប្រទេសជាង ៣០ មកពីជុំវិញពិភពលោកបានកោះប្រជុំវិសាមញ្ញមួយ ហើយបានយល់ព្រមលើការបញ្ចេញប្រេងរាប់សិបលានបារ៉ែលបន្ថែមលើទីផ្សារ” ។

កាលពីថ្ងៃព្រហស្បតិ៍ សេតវិមានបានប្រកាសថា សហរដ្ឋអាមេរិកនឹងចាប់ផ្តើមបញ្ចេញប្រេង ១ លានបារ៉ែលក្នុងមួយថ្ងៃពីស្តុកប្រេងយុទ្ធសាស្ត្រ ក្នុងគោលបំណងធ្វើឲ្យតម្លៃឧស្ម័នធ្លាក់ចុះ ។

យោងតាមលោក បៃដិន បានឲ្យដឹងថា ក្រុមហ៊ុនខួងយកប្រេងរបស់សហរដ្ឋអាមេរិកបានព្រងើយកន្តើយនឹងវិបត្តិថាមពល ដើម្បីរកប្រាក់ចំណេញដោយមិនចាំបាច់វិនិយោគ ។

កាលពីថ្ងៃទី ៨ ខែមីនា លោក បៃដិន បានប្រកាសថា សហរដ្ឋអាមេរិកនឹងធ្វើពហិការការនាំចូលថាមពលពីរុស្ស៊ីជុំវិញប្រតិបត្តិការយោធាពិសេសរបស់ខ្លួនក្នុងប្រទេសអ៊ុយក្រែន ដោយធ្វើឲ្យតម្លៃប្រេងឡើងថ្លៃបន្ថែមទៀត ។

ទន្ទឹមនោះ ប្រធានាធិបតីអាមេរិកបានហៅការឡើងថ្លៃនេះថាជា “ការដំឡើងថ្លៃរបស់លោក ពូទីន” ទោះបីជាប្រមុខរដ្ឋរុស្ស៊ីបានសង្កត់ធ្ងន់ម្តងហើយម្តងទៀតថា ប្រទេសរបស់ពួកគេកំពុងបំពេញកាតព្វកិច្ចរបស់ខ្លួនជាអ្នកផ្គត់ផ្គង់ប្រេង និងឧស្ម័ន ខណៈពេលដែលលោកខាងលិចកំពុងដាក់ទណ្ឌកម្មសេដ្ឋកិច្ចដែលមិនធ្លាប់មានពីមុនមកប្រឆាំងនឹងរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក បៃដិន ប្រកាសបញ្ចេញប្រេងបម្រុង ១ លានបារ៉ែលក្នុងមួយថ្ងៃ រយៈពេល ៦ ខែ