ទីបំផុត រកឃើញអ្នកកាសែត អ៊ុយក្រែន ដែលបាត់ខ្លួនក្នុងតំបន់ប្រយុទ្ធជាង ២០ ថ្ងៃ តែជាសាកសព

អ្នកកាសែតថតរូប និងផលិតករភាពយន្តឯកសារអ៊ុយក្រែនលោក Maks Levin ដែលបានបាត់ខ្លួនកាលពីថ្ងៃទី ១៣ ខែមីនា ពេលកំពុងធ្វើការនៅជួរមុខក្បែររដ្ឋធានីកៀវ ត្រូវបានគេរកឃើញស្លាប់ហើយ ។ នេះបើយោងតាមជំនួយការប្រធានាធិបតីអ៊ុយក្រែនលោក Andriy Yermak បានឲ្យដឹងកាលពីថ្ងៃសៅរ៍ ។

លោក Yermak បាននិយាយនៅលើបណ្ដាញ Telegram ថា “គាត់បានបាត់ខ្លួននៅក្នុងតំបន់ជម្លោះកាលពីថ្ងៃទី ១៣ ខែមីនានៅក្នុងតំបន់ទីក្រុងកៀវ ។ សាកសពរបស់គាត់ត្រូវបានគេរកឃើញនៅជិតភូមិ Guta Mezhygirska កាលពីថ្ងៃទី ១ ខែមេសា” ។

ចំណែកលោក Anton Gerashchenko ទីប្រឹក្សា និងជាអតីតអនុរដ្ឋមន្ត្រីនៅក្រសួងមហាផ្ទៃក៏បានបញ្ជាក់នៅលើ Telegram ដែរថា លោក Levin អាយុ ៤០ ឆ្នាំ បានបាត់ខ្លួនកាលពី ២ សប្តាហ៍មុន នៅពេលដែលគាត់កំពុងរាយការណ៍នៅក្នុងស្រុក Vishgorod ដែលជាតំបន់នៃការប្រយុទ្ធគ្នាដ៏ខ្លាំងក្លា ។

លោក​បាន​បន្ថែម​ថា “លោក Levin ត្រូវបានសម្លាប់ដោយការបាញ់ ២ គ្រាប់ពីអាវុធធុនតូចរបស់កងទ័ពរុស្ស៊ី ហើយពេលនេះលោក Levin ​បាន​បន្សល់​ទុក​កូន​ប្រុស​តូចៗ ៤ ​នាក់ ប្រពន្ធ និង​ឪពុក​ម្ដាយ​ចាស់​ជរាផងដែរ ។

លោក Gerashchenko និយាយប្រាប់សារព័ត៌មាន LB.ua របស់អ៊ុយក្រែនដែលលោក Levin បានបម្រើការងារអស់រយៈពេល ១០ ឆ្នាំថា “លោក Levin អមដោយមិត្តរួមការងារលោក Oleksiy Chernyshov ដែលជាអ្នកបម្រើ និងជាអតីតអ្នកថតរូបបានទៅតំបន់ Guta Mezhygirska កាលពីថ្ងៃទី ១៣ ខែមីនា ដើម្បីចងក្រងឯកសារអំពីផលវិបាកនៃការលុកលុយរបស់រុស្ស៊ី” ។

លោកបញ្ជាក់ថា “ពួកគេបានចេញពីឡាន ហើយធ្វើដំណើរក្នុងទិសដៅទៅភូមិ Moshchun តាំងពីពេលនោះមក ពុំមានការទាក់ទងជាមួយបុរសទាំងពីរនាក់នេះនោះទេ ។ ក្រោយមកទើបដឹងថា សកម្មភាពប្រយុទ្ធគ្នាដ៏ខ្លាំងក្លាបានចាប់ផ្តើមនៅតំបន់ដែលលោក Maks Levin នឹងទៅធ្វើការ ខណៈទីតាំង និងវាសនារបស់លោក Oleksiy Chernyshow បច្ចុប្បន្នមិនត្រូវបានគេដឹងនៅឡើយទេ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ វិមានក្រឹមឡាំង ថា បើអ្នកណាហ៊ានវ៉ៃប្រទេសសម្ព័ន្ធមិត្តខ្លួនមួយនេះ ដូចវាយប្រហារលើ រុស្ស៊ី