រុស្ស៊ី ថា ប្រទេសអឺរ៉ុបមួយនេះមានអំណាចបំផុត ក្នុងចំណោមរដ្ឋសមាជិក ណាតូ ទាំងអស់

អ្នកនាំពាក្យវិមានក្រឹមឡាំងលោក Dmitriy Peskov បានសរសើរទំនាក់ទំនងរបស់រុស្ស៊ីជាមួយប្រទេសតួកគី ដោយសង្កត់ធ្ងន់ថា ទីក្រុងអង់ការ៉ាគឺជាមហាអំណាចក្នុងតំបន់ដ៏សំខាន់ និងមានឥទ្ធិពលបំផុតក្នុងចំណោមរដ្ឋសមាជិកណាតូទាំងអស់ ។

នៅក្នុងបទសម្ភាសន៍ជាមួយទូរទស្សន៍រដ្ឋបេឡារុស លោក Peskov បានឲ្យដឹងថា រុស្ស៊ីគឺមានទំនាក់ទំនងល្អជាមួយតួកគី ហើយតួកគីក៏ជាផ្នែកមួយនៃការចរចាររវាងរុស្ស៊ី និងអ៊ុយក្រែនផងដែរ បន្ទាប់ពីគណៈប្រតិភូភាគីបានជួបគ្នានៅក្នុងទីក្រុងអ៊ីស្តង់ប៊ុល ។

លោកបានចង្អុលបង្ហាញថា ប្រធានាធិបតីតួកគីលោក Recep Tayyip Erdogan គឺជាមេដឹកនាំនយោបាយដ៏អស្ចារ្យ និងរឹងមាំ ហើយបាននិយាយថា “ប្រទេសតួកគីគឺជាមហាអំណាច និងប្រទេសក្នុងតំបន់ដ៏សំខាន់បំផុត ។ ទំនាក់​ទំនង​របស់​យើង​ជាមួយតួកគីគឺ​ល្អ​ឥត​ខ្ចោះ“ ។

លោក Peskov បាននិយាយថា “តួកគីតែងតែជាមហាអំណាចទ្រង់ទ្រាយធំក្នុងតំបន់ ហើយតួកគីជាសមាជិករបស់ណាតូអស់រយៈពេលជាច្រើនឆ្នាំមកហើយ” ។

ជាចុងក្រោយលោក Peskov បញ្ជាក់ថា “បច្ចុប្បន្នតួកគីក្លាយជារដ្ឋលេចធ្លោជាងគេក្នុងចំណោមរដ្ឋអធិបតេយ្យភាពសមាជិកណាតូ ជាពិសេសក្នុងអំឡុងពេលកាន់តំណែងរបស់លោកប្រធានាធិបតី Erdogan ហើយតួកគី​ក៏ជា​ប្រទេស​ដែល​មាន​ប្រណីតភាព​ក្នុង​ការ​ការពារ​ផលប្រយោជន៍​របស់​ខ្លួនផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ វិមានក្រឹមឡាំង ថា បើអ្នកណាហ៊ានវ៉ៃប្រទេសសម្ព័ន្ធមិត្តខ្លួនមួយនេះ ដូចវាយប្រហារលើ រុស្ស៊ី