អាមេរិក​ ប្រកាស​ផ្តល់​ជំនួយ​យោធា​ក្នុងទំហំទឹកប្រាក់ ១០០​លាន​ដុល្លារបន្ថែមទៀត​ដល់ ​អ៊ុយក្រែន

រដ្ឋមន្ត្រីការបរទេសអាមេរិក លោក Antony Blinken បាននិយាយនៅថ្ងៃពុធទី០៦ខែមេសានេះថា ទីក្រុងវ៉ាស៊ីនតោន នឹងបញ្ជូនជំនួយបន្ថែមស្មើនឹងទំហំទឹកប្រាក់ចំនួន ១០០លានដុល្លារទៅឲ្យអ៊ុយក្រែន ដើម្បីបំពេញតម្រូវការបន្ទាន់របស់ខ្លួន សម្រាប់ប្រព័ន្ធប្រឆាំងគ្រឿងសឹក។

នៅក្នុងសេចក្តីថ្លែងការណ៍មួយ លោក Blinken និយាយថា នេះគឺជាជំនួយជាអាវុធ គ្រឿងបរិក្ខារ និងការផ្គត់ផ្គង់ទីប្រាំមួយរបស់សហរដ្ឋអាមេរិក ទៅឲ្យអ៊ុយក្រែន និងថា វាធ្វើឲ្យជំនួយសន្តិសុខសរុបរបស់សហរដ្ឋអាមេរិក ទៅឲ្យទីក្រុង កៀវ កើនឡើងដល់ទំហំទឹកប្រាក់ជាង ១.៧ ពាន់លានដុល្លារ ចាប់តាំងពីការលុកលុយរបស់រុស្ស៊ីចាប់ផ្តើម។

លោកបានបន្ថែមថា លោក “តក់ស្លុត និងរន្ធត់” ចំពោះការសម្លាប់នៅក្នុងទីក្រុង Bucha ហើយបានសន្យាថា នឹងធ្វើការជាមួយសម្ព័ន្ធមិត្តរបស់សហរដ្ឋអាមេរិក ដើម្បីធានានូវការទទួលខុសត្រូវ តាមរយៈការកត់ត្រាការរំលោភបំពាន។

ស្របពេលជាមួយគ្នានោះ យោងតាមទីភ្នាក់ងារសារព័ត៌មាន Associated Press ដែលដកស្រង់សម្តីមន្ត្រីរដ្ឋាភិបាលអាមេរិក បានឲ្យដឹងថា ជំនួយបន្ថែមនេះគឺសម្រាប់ការផ្ទេរមីស៊ីលប្រឆាំងគ្រឿងសឹក Javelin៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ស្រ្តីបាញ់ស៊ីបដៃឯក “Charcoal” ក្លាយជាវីរនារី អ៊ុយក្រែន