ព្យុះ Molave បង្ខំឲ្យប្រជាជនហ្វីលីពីនរាប់ពាន់នាក់ជម្លៀសខ្លួន – Kampuchea Thmey Daily
Connect with us

ព័ត៌មានអន្ដរជាតិ

ព្យុះ Molave បង្ខំឲ្យប្រជាជនហ្វីលីពីនរាប់ពាន់នាក់ជម្លៀសខ្លួន

Published

on

នៅថ្ងៃចន្ទ ទី២៦ ខែតុលា នេះ ព្យុះដ៏ខ្លាំងមួយបានឲ្យបង្ខំអ្នកភូមិរាប់ពាន់នាក់ភៀសខ្លួនទៅរកកន្លែងសុវត្ថិភាពនៅតាមខេត្តនានានៅភាគខាងត្បូងនៃរដ្ឋធានីហ្វីលីពីន ហើយក៏បណ្ដាលឲ្យមានការជន់លិចភូមិជនបទ និងបាក់ដំបូលផ្ទះជាដើម ។

មិនមានសេចក្តីរាយការណ៍ភ្លាមៗអំពីការស្លាប់ និងរបួសពីព្យុះទីហ្វុង Molave ទេ ប៉ុន្តែអាជ្ញាធរបានរាយការណ៍ថា យ៉ាងហោចណាស់មនុស្សម្នាក់បានបាត់ខ្លួន និង ៧ នាក់ផ្សេងទៀតត្រូវបានជួយសង្គ្រោះបន្ទាប់ពីទូករបស់ពួកគេបានលិចនៅឯខេត្ត Batangas ភាគខាងត្បូងនៃទីក្រុងម៉ានីល ។

ព្យុះទីហ្វុងនេះមានល្បឿនខ្យល់បក់រហូតដល់ ១២៥ គីឡូម៉ែត្រ និងសន្ទុះដល់ ១៨០ គីឡូម៉ែត្រ ហើយកំពុងបក់ទៅទិសខាងលិចក្នុងចម្ងាយ ២៥ គីឡូម៉ែត្រ ។ ក្រុមអ្នកព្យាករណ៍រដ្ឋាភិបាលបាននិយាយថា ព្យុះ Molave ត្រូវបានគេរំពឹងថានឹងចាប់ផ្តើមបក់ចេញពីប្រទេសនេះចូលទៅក្នុងសមុទ្រចិនខាងត្បូងនៅថ្ងៃចន្ទនេះផងដែរ ។

យោងតាមការិយាល័យការពារជនស៊ីវិលបាននិយាយថា យ៉ាងហោចណាស់អ្នកភូមិ ២៥,០០០ នាក់ត្រូវបានផ្លាស់ទីលំនៅ ខណៈដែលមនុស្សប្រហែល ២ ម៉ឺននាក់បានជ្រកកោននៅតាមសាលារៀន និងអគាររដ្ឋាភិបាលដែលត្រូវបានប្រែក្លាយជាមជ្ឈមណ្ឌលជម្លៀស ។

លោក Humerlito Dolor អភិបាលខេត្ត Oriental Mindoro បានប្រាប់វិទ្យុ DZMM ថា “ឥឡូវនេះអ្នកភូមិកំពុងសុំការជួយសង្គ្រោះដោយសារខ្យល់កំពុងបោកបក់ខ្លាំងដែលបណ្តាលឲ្យបាក់ដំបូល ។

លោក Dolor បាននិយាយថា ភ្លៀងធ្លាក់ពេញមួយយប់បានបំផ្លាញភូមិកសិកម្មជាច្រើននៅក្នុងខេត្តរបស់លោក បន្ទាប់មកខ្យល់បក់យ៉ាងខ្លាំងបានរំលំដើមឈើ និងបង្គោលភ្លើងនៅព្រឹកថ្ងៃចន្ទនេះដោយកាត់ផ្តាច់ភ្លើងផងដែរ ។ លោកបាននិយាយថា អាជ្ញាធរកំពុងបោសសម្អាតផ្លូវនៃដើមឈើដែលបាក់ និងកម្ទេចកម្ទីនៅតាមទីប្រជុំជនមួយចំនួនបន្ទាប់ពីព្យុះបានបក់បោក ។

ទន្ទឹមនោះអ្នកបើកបររថយន្តដឹកកម្មករ និងអ្នកដំណើរជាង ១,៨០០ នាក់បានជាប់គាំងនៅក្នុងកំពង់ផែបន្ទាប់ពីឆ្មាំឆ្នេរបានរារាំងកប៉ាល់ និងទូកសាឡាងពីការបើកចូលទៅក្នុងសមុទ្រ ។

គួរបញ្ជាក់ថា ប្រទេសហ្វីលីពីនជារៀងរាល់ឆ្នាំជួបប្រទះនូវព្យុះទីហ្វុង និងខ្យល់ព្យុះប្រហែល​ ២០ ហើយប្រទេសមួយនេះបានក្លាយជាប្រទេសនៅតំបន់អាស៊ីអាគ្នេយ៍ដែលងាយរងគ្រោះដោយគ្រោះមហន្តរាយបំផុតនៅលើពិភពលោក ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ព្យុះមួយមិនទាន់ផុតផង ពេលនេះវៀតណាមជួបព្យុះមួយទៀត

ចុចអាន ៖ WHO និយាយជាថ្មីម្តងទៀតថា ថ្នាំ Remdesivir មានប្រសិទ្ធិភាពតិចតួច ឬគ្មានតែម្ដងសម្រាប់ការព្យាបាលជំងឺកូវីដ ១៩

ចុច Like Facebook កម្ពុជាថ្មី

ព័ត៌មានពេញនិយម