ថៃ អះអាងថា ការបញ្ជាទិញនាវាមុជទឹកបំពាក់ម៉ាស៊ីនម៉ាស៊ូតពី ចិន កំពុងដំណើរការ មិនមានបញ្ហាអ្វីទេ

នៅវិមានរដ្ឋាភិបាលថៃលោកឧបនាយករដ្ឋមន្ត្រី Prawit Wongsuwan បានថ្លែងដោយខ្លីចំពោះមុខក្រុមអ្នកសារព័ត៌មានថា ចំពោះករណីនាវាមុជទឹករបស់ចិនដែលថៃបានបញ្ជាទិញកំពុងដំណើរការ ហើយពិតជាមានគ្រឿងម៉ាស៊ីន និងមិនមានបញ្ហាអ្វីទេ ។

លោក Prawit Wongsuwan បាននិយាយកាលពីថ្ងៃពុធថា កិច្ចព្រមព្រៀងទិញនាវាមុជទឹកជាមួយទីក្រុងប៉េកាំងកំពុងដំណើរការទៅមុខ បើទោះបីជាមានការសង្ស័យពីមុនដែលលើកឡើងដោយនាយករដ្ឋមន្ត្រីទាក់ទងនឹងបញ្ហាម៉ាស៊ីនក៏ដោយ ។

ការលើកឡើងនេះកើតឡើង ស្របពេលដែលលោកនាយករដ្ឋមន្ត្រី Prayut Chan-ocha បានលើកឡើងកាលពីថ្ងៃអង្គារថា ប្រទេសថៃក៏សុខចិត្តលុបចោលកុងត្រាទិញនាវាមុជទឹកពីចិនផងដែរ ប្រសិនបើនាវាមុជទឹកចិនមិនអាចបំពាក់ម៉ាស៊ីនម៉ាស៊ូតរបស់អាល្លឺម៉ង់ដូចដែលបានបញ្ជាក់ក្នុងកិច្ចព្រមព្រៀងនោះ ។

យោងតាមកិច្ចព្រមព្រៀងដែលត្រូវបានចុះហត្ថលេខាក្នុងឆ្នាំ ២០១៧ បានឲ្យដឹងថា នាវាមុជទឹកប្រភេទ S26T Yuan-class ដែលប្រទេសថៃបានបញ្ជាទិញពីចិនត្រូវបានបំពាក់ជាមួយនឹងម៉ាស៊ីនម៉ាស៊ូត MTU396 ចំនួន ៣ គ្រឿងពីក្រុមហ៊ុន Motor and Turbine Union របស់ប្រទេសអាល្លឺម៉ង់ ។

គួរបញ្ជាក់ថា កន្លងមកបញ្ហានេះក៏កើតឡើង បន្ទាប់ពីក្រុមហ៊ុនអាល្លឺម៉ង់មិនអាចផ្គត់ផ្គង់ម៉ាស៊ីននេះនោះបានទេ ដោយសារការហាមឃាត់អាវុធរបស់សហភាពអឺរ៉ុបដែលត្រូវបានដាក់លើប្រទេសចិន បន្ទាប់ពីការសម្លាប់រង្គាលនៅទីលានធានអានមិនក្នុងឆ្នាំ ១៩៨៩ ៕

ប្រែសម្រួលដោយ ៖ ជីវ័ន្ត

ប្រភព ៖ Thai Enquirer

ចុចអាន ៖ លោក ថាក់ស៊ីន ស៊ីណាវ៉ាត្រា ក្លាយជាមហាសេដ្ឋី មានជាងគេរបស់ ថៃ