នេះប្រភេទមីស៊ីលដែល រុស្ស៊ី ប្រើវាយប្រហារស្ថានីយ៍រថភ្លើង អ៊ុយក្រែន ស្លាប់ជិត ៥០ នាក់

មន្ត្រីការពារជាតិអាមេរិកជាន់ខ្ពស់ម្នាក់បាននិយាយថា កងកម្លាំងរុស្ស៊ីបានប្រើកាំជ្រួចមីស៊ីលផ្លោងរយៈចម្ងាយខ្លីក្នុងការវាយប្រហារស្ថានីយរថភ្លើងមួយក្នុងទីក្រុង Kramatorsk ភាគខាងកើតអ៊ុយក្រែនកាលពីថ្ងៃសុក្រ ។

អ៊ុយក្រែនបាននិយាយថា មនុស្សយ៉ាងហោចណាស់ ៥០ នាក់បានស្លាប់ និងជាច្រើននាក់ទៀតរងរបួសនៅក្នុងការវាយប្រហារលើស្ថានីយរថភ្លើងមួយក្នុងទីក្រុង Kramatorsk ដែលពោរពេញទៅដោយជនស៊ីវិល ខណៈដែលពួកគេសង្ឃឹមថានឹងអាចគេចចេញពីការគំរាមកំហែងនៃការវាយលុកដ៏ធំរបស់រុស្ស៊ី ។

យោងតាមមន្ត្រីការពារជាតិអាមេរិកដែលនិយាយក្នុងលក្ខខណ្ឌមិនបញ្ចេញឈ្មោះបានឲ្យដឹងថា កងកម្លាំងរុស្ស៊ីបានប្រើកាំជ្រួចមីស៊ីល SS-21 ក្នុងការវាយប្រហារនោះ ប៉ុន្តែមូលហេតុសម្រាប់ការវាយប្រហារនេះមិនទានដឹងច្បាស់នៅឡើយទេ ខណៈសហរដ្ឋអាមេរិកក៏នៅតែកំពុងវិភាគលើការវាយប្រហារនេះផងដែរ ហើយវាមិនច្បាស់ថាតើគ្រាប់បែកចង្កោមត្រូវបានប្រើប្រាស់ឬយ៉ាងណានោះ ។

ទន្ទឹមនោះ ទីភ្នាក់ងារសារព័ត៌មាន RIA បានរាយការណ៍ថា មីស៊ីលដែលដែលត្រូវបានវាយប្រហារលើស្ថានីយ៍រថភ្លើងនេះ គឺត្រូវបានប្រើប្រាស់តែយោធាអ៊ុយក្រែនប៉ុណ្ណោះ ហើយកងកម្លាំងប្រដាប់អាវុធរបស់រុស្ស៊ីមិនបានកំណត់គោលដៅវាយប្រហារលើទីក្រុង Kramatorsk នោះទេ ។

គួរបញ្ជាក់ថា SS-21 គឺជាឈ្មោះដែលប្រើដោយសម្ព័ន្ធយោធាណាតូសម្រាប់ប្រភេទមីស៊ីលដែលគេស្គាល់ថាជា Tochka នៅក្នុងអតីតរដ្ឋសូវៀត ៕

ប្រែសម្រួលដោយ ៖ ជីវ័ន្ត

ប្រភព ៖ NDTV

ចុចអាន ៖ រុស្ស៊ី បាញ់កម្ទេចទីក្រុងហ្វឹកហ្វឺនទាហានស៊ីឈ្នួលបរទេសមួយកន្លែងរបស់ អ៊ុយក្រែន (មានវីដេអូ)