លោក Zelensky ថា គោលដៅរបស់រុស្ស៊ី គឺអឺរ៉ុបទាំងមូល មិនមែនត្រឹមតែ អ៊ុយក្រែន ទេ 

ប្រធានាធិបតីអ៊ុយក្រែនលោក Volodymyr Zelensky បាននិយាយក្នុងអំឡុងសុន្ទរកថារបស់គាត់កាលពីយប់ថ្ងៃសៅរ៍ទី០៩ខែមេសាថា ការលុកលុយរបស់រុស្ស៊ី មិនត្រូវបានកំណត់តែចំពោះអ៊ុយក្រែននោះទេ ហើយអឺរ៉ុបទាំងមូលគឺជាគោលដៅ។

ស្របពេលជាមួយគ្នានោះ លោក Zelensky បានជំរុញឲ្យលោកខាងលិច ដាក់ទណ្ឌកម្មទាំងស្រុងលើផលិតផលថាមពលរបស់រុស្ស៊ី និងផ្គត់ផ្គង់អាវុធបន្ថែម ដល់អ៊ុយក្រែន។

លោក​បាន​និយាយ​ថា ការ​ប្រើ​កម្លាំង​របស់​រុស្ស៊ី​គឺ​ជា “មហន្តរាយ​ដែល​នឹង​វាយប្រហារ​គ្រប់​គ្នា​ដោយ​ចៀស​មិន​រួច”។

លោក Zelensky បន្តថា អ៊ុយក្រែនបានត្រៀមខ្លួនរួចជាស្រេច សម្រាប់ការប្រយុទ្ធដ៏ស្វិតស្វាញ ខណៈដែលកងកម្លាំងរុស្ស៊ីកំពុងប្រមូលផ្តុំគ្នានៅភាគខាងកើតប្រទេស។

ប៉ុន្តែលោកបានបន្ថែមថា “នេះនឹងក្លាយជាសមរភូមិដ៏លំបាកមួយ យើងជឿជាក់លើការប្រយុទ្ធនេះ និងជ័យជម្នះរបស់យើង។ យើងត្រៀមខ្លួនរួចជាស្រេចដើម្បីប្រយុទ្ធក្នុងពេលដំណាលគ្នា និងស្វែងរកមធ្យោបាយការទូត ដើម្បីបញ្ចប់សង្រ្គាមនេះ”៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី បង្ហាញសាច់ដុំយោធានៅ Kaliningrad បន្ទាប់ពីព្រមាន លោកខាងលិច