អាមេរិក ថា មេបញ្ជាការដែលលោក ពូទីន ទើបតែងតាំង មានកំណត់ត្រា ប្រព្រឹត្តអំពើឃោរឃៅប្រឆាំងជនស៊ីវិល

កាលពីថ្ងៃអាទិត្យទី១០ខែមេសាម្សិលមិញនេះ ប្រទេសរុស្ស៊ីបានតែងតាំងមេបញ្ជាការថ្មីម្នាក់ ឲ្យដឹកនាំសង្គ្រាមនៅអ៊ុយក្រែន។

តាមសេចក្តីរាយការណ៍ លោកឧត្តមសេនីយ៍ Alexander Dvornikov អាយុ៦០ឆ្នាំ ដែលជាមន្ត្រីយោធាមានបទពិសោធន៍បំផុតម្នាក់របស់រុស្ស៊ី នឹងដឹកនាំកិច្ចខិតខំប្រឹងប្រែងជាថ្មី ដែលគេរំពឹងថានឹងវាយប្រហារតំបន់ភាគខាងកើត។

មន្ត្រីសហរដ្ឋអាមេរិកនិយាយថា លោក Dvornikov មានកំណត់ត្រា ប្រព្រឹត្តអំពើឃោរឃៅប្រឆាំងជនស៊ីវិលនៅក្នុងប្រទេសស៊ីរី និងតំបន់សង្រ្គាមផ្សេងទៀត។

ស្របពេលជាមួយគ្នានោះ ទីប្រឹក្សាសន្តិសុខជាតិសេតវិមានលោក Jake Sullivan បាននិយាយថា “ទោះមានការតែងតាំងឧត្តមសេនីយ៍ថ្មីណាមួយក៏ដោយ ក៏មិនអាចលុបបំបាត់ការពិតដែលថា រុស្ស៊ីបានប្រឈមមុខនឹងបរាជ័យជាយុទ្ធសាស្ត្រនៅអ៊ុយក្រែនរួចទៅហើយដែរ”។

លោក Sullivan បានប្រាប់ CNN ថា “ឧត្តមសេនីយ៍រូបនេះ នឹងក្លាយជាអ្នកបង្កឧក្រិដ្ឋកម្ម និងអំពើឃោរឃៅមួយទៀត ប្រឆាំងនឹងជនស៊ីវិលអ៊ុយក្រែន”។

“ហើយដូចដែលខ្ញុំបាននិយាយពីមុនមកអ៊ីចឹង សហរដ្ឋអាមេរិក គឺប្តេជ្ញាធ្វើអស់ពីសមត្ថភាព ដើម្បីគាំទ្រជនជាតិអ៊ុយក្រែន នៅពេលដែលពួកគេទប់ទល់នឹងគាត់ ហើយពួកគេទប់ទល់នឹងកងកម្លាំងដែលគាត់បញ្ជា”៕

ប្រែសម្រួល៖ Vann Vann

ប្រភព៖ SKY

ចុចអាន៖ មេដឹកនាំ EU ដំបូងគេ ទៅជួប Putin ដោយផ្ទាល់ ចាប់តាំងពីសង្គ្រាមនៅ អ៊ុយក្រែន ផ្ទុះឡើង