អ៊ុយក្រែន រកឃើញសាកសពមនុស្សជាង ១២០០ នាក់នៅក្នុងតំបន់ កៀវ ក្រោយរុស្ស៊ី ដកទ័ព (មានវីដេអូ)

អគ្គរដ្ឋអាជ្ញាអ៊ុយក្រែននិយាយថា សាកសពមនុស្សចំនួន ១២២២ នាក់ ត្រូវបានរកឃើញនៅក្នុងតំបន់ កៀវ ចាប់តាំងពីកងកម្លាំងរុស្ស៊ី ដកចេញពីតំបន់នោះ។

លោកស្រី Iryna Veneditktova បានប្រាប់ Sky News ថា អាជ្ញាធរអ៊ុយក្រែនកំពុងស៊ើបអង្កេតឧក្រិដ្ឋកម្មសង្រ្គាមចំនួន ៥៦០០ករណី ដែលត្រូវបានប្រព្រឹត្តដោយទាហានរុស្ស៊ី ចាប់តាំងពីសង្គ្រាមផ្ទុះឡើង ហើយខ្លួនបានកំណត់អត្តសញ្ញាណឧក្រិដ្ឋជនសង្រ្គាមជាង ៥០០នាក់ រួមទាំងមន្ត្រីយោធាកំពូល និងរដ្ឋាភិបាលនៅក្នុងប្រទេសរុស្ស៊ីផងដែរ។

យោងតាមលោកស្រី, “អ្វីដែលយើងឃើញនៅក្នុងតំបន់ទាំងអស់នៃប្រទេសអ៊ុយក្រែន គឺជាឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ ហើយយើងធ្វើអ្វីគ្រប់យ៉ាងដើម្បីជួសជុលវា”។

លោកស្រីបន្ថែមថា អ៊ុយក្រែនមានភស្តុតាងដែលថា រុស្ស៊ីបានធ្វើការវាយប្រហារដោយមីស៊ីលលើស្ថានីយ៍រថភ្លើងនៅទីក្រុង Kramatorsk ភាគខាងកើត សម្លាប់មនុស្សជាង ៥០នាក់ដែលកំពុងរង់ចាំរថភ្លើងដើម្បីជម្លៀសពួកគេទៅភាគខាងលិច។

ទោះបីជាយ៉ាងណាក៏ដោយ​ រុស្ស៊ី​បាន​បដិសេធ​ថា ខ្លួន​មិន​បាន​ទទួល​ខុស​ត្រូវ​ចំពោះ​ការ​វាយ​ប្រហារ​កាល​ពី​ថ្ងៃ​សុក្រទេ ហើយ​បាន​អះអាង​ថា វា​មិន​មែន​ជាមីស៊ីល​របស់​ពួក​គេ​ឡើយ។ រុស្ស៊ី​ក៏​បាន​បដិសេធ​ការ​កំណត់​គោលដៅ​លើ​ជន​ស៊ីវិលផង​ដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក ថា មេបញ្ជាការដែលលោក ពូទីន ទើបតែងតាំង មានកំណត់ត្រា ប្រព្រឹត្តអំពើឃោរឃៅប្រឆាំងជនស៊ីវិល