ព័ត៌មានអន្ដរជាតិ

មេដឹកនាំសាធារណរដ្ឋ Chechen លោក Kadyrov និយាយថា កម្លាំងរុស្ស៊ីនឹងវ៉ៃយកទីក្រុងកៀវ

បានផុស

៣ years មុន

នៅ

ថ្ងៃចន្ទ ១១ មេសា ២០២២

ដោយ

លោក Ramzan Kadyrov ប្រមុខដឹកនាំដ៏មានឥទ្ធិពលនៃសាធារណៈរដ្ឋ Chechnya របស់ប្រទេសរុស្ស៊ីបាននិយាយនៅព្រឹកថ្ងៃចន្ទនេះថា នឹងមានការវាយប្រហារដ៏ខ្លាំងក្លាមួយដោយកម្លាំងទ័ពរុស្ស៊ីដែលមិនត្រឹមតែយកបានទីក្រុង Mariupol ប៉ុណ្ណោះទេ ប៉ុន្តែសូម្បីតែទីក្រុងកៀវ និងទីក្រុងផ្សេងៗទៀតរបស់អ៊ុយក្រែន។

លោក Kadyrov បាននិយាយក្នុងវីដេអូចែករំលែកតាមបណ្តាញ Telegram របស់លោកថា ៖«នឹងមានការវាយប្រហារខ្លាំងក្លាមួយ មិនត្រឹមតែលើទីក្រុង Mariupol មួយនោះទេ តែទីប្រជុំជន ទីក្រុង និងភូមិផ្សេងៗទៀតផងដែរ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ទីក្រុង Luhansk និង Donetsk យើងនឹងរំដោះបានពេញលេញមុនគេ… ហើយបន្ទាប់មកទីក្រុងកៀវ និងទីក្រុងផ្សេងៗទៀតទាំងអស់»។ លោកបានប្រាប់។

លោក Kadyrov ដែលតែងតែពិពណ៌នាខ្លួនឯងជាទាហានថ្មើរជើងរបស់លោកប្រធានាធិបតីរុស្ស៊ី វ្លាឌីមៀរ ពូទីន បាននិយាយថា មិនគួរមានការសង្ស័យអំពីក្រុងកៀវទេ។ «ខ្ញុំធានាថា នឹងមិនដកថយទេ សូម្បីមួយជំហាន»។

លោក Kadyrov ត្រូវបានសហរដ្ឋអាមេរិក និងសហភាពអឺរ៉ុប ចោទប្រកាន់ពីការរំលោភសិទ្ធិមនុស្ស ប៉ុន្តែលោកបានបដិសេធ។

ទីក្រុងមូស្គូបានធ្វើសង្គ្រាមចំនួនពីរជាមួយក្រុមបំបែកខ្លួននៅតំបន់ Chechnya ដែលភាគច្រើនជាមូស្លីមនៅភាគខាងត្បូងរុស្ស៊ី បន្ទាប់ពីការបែកបាក់សហភាពសូវៀតឆ្នាំ១៩៩១។ ប៉ុន្តែចាប់តាំងពីពេលនោះមក រុស្ស៊ីបានចំណាយប្រាក់យ៉ាងច្រើនចូលទៅក្នុងតំបន់ដើម្បីកសាងឡើងវិញ ហើយបានផ្តល់ឲ្យលោក Kadyrov នូវការគ្រប់គ្រងដោយស្វ័យតកាន់តែខ្លាំង។

វិមានក្រឹមឡាំងបានចាត់ទុកសកម្មភាពរបស់ខ្លួននៅអ៊ុយក្រែនជា«ប្រតិបត្តិការយោធាពិសេស»ដើម្បីធ្វើឲ្យប្រទេសអ៊ុយក្រែនគ្មានអាវុធ និងអព្យាក្រឹត ហើយកាលពីថ្ងៃអាទិត្យ រុស្ស៊ី បានបង្កើនការវាយប្រហារទៅភាគខាងកើតអ៊ុយក្រែន៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសរុស្ស៊ី