ជាលើកដំបូង លោក បៃដិន ចោទប្រកាន់លោក ពូទីន ប្រព្រឹត្តអំពើប្រល័យពូជសាសន៍

ថ្លែងក្នុងព្រឹត្តិការណ៍មួយនៅរដ្ឋ Iowa អំពីតម្លៃថាមពលក្នុងស្រុក ប្រធានាធិបតីអាមេរិកលោក ចូ បៃដិន បានហៅសកម្មភាពរបស់រុស្ស៊ីនៅអ៊ុយក្រែនថាជា “អំពើប្រល័យពូជសាសន៍”។

ឃ្លានេះ គឺជាពាក្យទីមួយសម្រាប់រដ្ឋបាលសេតវិមាន ដែលតែងតែគេចវេសមិនប្រើពាក្យ ចោទប្រកាន់ខ្លាំងៗ ពាក់ព័ន្ធការសម្លាប់ជនស៊ីវិដោយស្នាដៃរបស់ រុស្ស៊ី។

លោក បៃដិន និយាយថា “កញ្ចប់ថវិកាគ្រួសាររបស់អ្នក សមត្ថភាពរបស់អ្នកក្នុងការបំពេញធុង មិនគួរពឹងផ្អែកទៅលើថាតើមេដឹកនាំផ្តាច់ការប្រកាសសង្រ្គាម និងប្រព្រឹត្តអំពើប្រល័យពូជសាសន៍នៅពាក់កណ្តាលពិភពលោកនេះឬក៏អត់នោះទេ”។

នៅពេលសួរដោយអ្នកសារព័ត៌មានអំពីការលើកឡើងរបស់គាត់ លោក បៃដិន បាននិយាយថា “ខ្ញុំហៅវាថាជាអំពើប្រល័យពូជសាសន៍ ព្រោះវាកាន់តែច្បាស់ថា លោក​ ពូទីន កំពុងព្យាយាមលុបបំបាត់គំនិតរបស់អ៊ុយក្រែន ហើយមានភ័ស្តុតាងកាន់តែច្រើន”។

លោក​​បន្ថែម​ថា “​យើង​នឹង​អនុញ្ញាត​ឲ្យ​មេធាវី​សម្រេច​ជា​អន្តរជាតិ​ថា ​តើ​វា​មាន​លក្ខណៈ​​គ្រប់គ្រាន់​ឬ​អត់ ប៉ុន្តែ​វា​ប្រាកដ​ណាស់​ថា ​ខ្ញុំ​គិត​បែប​នេះ​”។

ស្របពេលជាមួយគ្នានោះដែរ ប្រធានាធិបតីអ៊ុយក្រែនលោក Zelensky បានពណ៌នាការសម្លាប់ជនស៊ីវិលនៅក្នុងទីក្រុង Bucha ក្បែរទីក្រុង កៀវ ដែលបង្កឲ្យមានការចោទប្រកាន់យ៉ាងទូលំទូលាយអំពីឧក្រិដ្ឋកម្មសង្គ្រាមថាជា “អំពើប្រល័យពូជសាសន៍ពិតប្រាកដ”។

ហើយមុននេះបន្តិច ប្រធានាធិបតីអ៊ុយក្រែនបាននិយាយថា ផ្នូរនៃការសម្លាប់រង្គាលថ្មីៗ ត្រូវបានគេរកឃើញស្ទើរតែរាល់ថ្ងៃ នៅក្នុងតំបន់ដែលធ្លាប់កាន់កាប់ដោយរុស្ស៊ី៕

ប្រែសម្រួល៖ Vann Vann

ប្រភព៖ BBC, Al Arabiya

ចុចអាន៖ មេទ័ពលោក ពូទីន ប្រាប់ឲ្យទម្លាក់គ្រាប់បែកនុយក្លេអ៊ែរ បើបច្ចឹមប្រទេស ហ៊ានធ្វើរឿងមួយ