ប្រជាជនពិភពលោកមួយភាគបួននឹងមិនទទួលបានវ៉ាក់សាំងកូវីដឡើយរហូតដល់ឆ្នាំ២០២២ឯណោះ

ការស្រាវជ្រាវថ្មីបានបង្ហាញថា ស្ទើរតែមួយភាគបួននៃចំនួនប្រជាជនពិភពលោកនឹងមិនទទួលបានវ៉ាក់សាំងកូវីដ១៩ទេរហូតដល់ឆ្នាំ២០២២ឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញមកពីសាលាសុខភាពសាធារណៈ Johns Hopkins Bloomberg ក្នុងទីក្រុង Baltimore សហរដ្ឋអាមេរិកបាននិយាយថា បណ្តាប្រទេសដែលមានប្រាក់ចំណូលខ្ពស់គឺទទួលបានវ៉ាក់សាំងរាប់ពាន់លានដូសរួចទៅហើយប៉ុន្តែវានៅតែមានភាពមិនច្បាស់លាស់ជុំវិញថាតើប្រទេសដែលមានប្រាក់ចំណូលមធ្យមនិងទាបអាចទទួលបានវ៉ាក់សាំងដែរឬអត់។

ពួកគេនិយាយថា ក្នុងចំណោមវ៉ាក់សាំងកូវីដចំនួន៤៨ដែលត្រូវបានអនុម័តឬកំពុងអភិវឌ្ឍន៍ ក្រុមហ៊ុនចំនួន១៣បានឈានដល់កិច្ចព្រមព្រៀងសម្រាប់វ៉ាក់សាំងចំនួន៧.៤៨ពាន់លានដូសរួចទៅហើយ។

ពួកគេបានកត់សម្គាល់នៅក្នុងទសនាវដ្តីវេជ្ជសាស្រ្តអង់គ្លេស (BMJ) ថា ក្នុងចំណោមបណ្តាប្រទេសដែលមានប្រាក់ចំណូលខ្ពស់រាប់បញ្ចូលទាំងប្លុកសហភាពអឺរ៉ុបផងដែរបានបម្រុងទុកវ៉ាក់សាំងទាំងនេះ៥១ភាគរយឬប្រហែល៣,៨៥ពាន់លានដូសថ្វីបើប្រទេសទាំងនោះរួមចំណែកត្រឹម១៣,៧ភាគរយនៃប្រជាជនសរុបរបស់ពិភពលោកក៏ដោយ។

ក្នុងចំណោមក្រុមហ៊ុនផលិតវ៉ាក់សាំងទាំង១៣ មានតែក្រុមហ៊ុន៦ប៉ុណ្ណោះដែលបានលក់ថ្នាំបង្ការទៅឲ្យប្រទេសដែលមានប្រាក់ចំណូលទាបនិងមធ្យម។

ពួកគេនិយាយថា ក្រុមហ៊ុនអ្នកទាំង៦នោះរួមមានទាំងក្រុមហ៊ុន AstraZeneca/Oxford University និង Novavax ផងដែរ។

ក្រុមអ្នកជំនាញបានព្រមានថា បើទោះបីជាក្រុមហ៊ុនផលិតបានសម្រេចនូវគោលដៅផលិតកម្មរបស់ពួកគេក៏ដោយ ក៏ប្រជាជននៅក្នុងប្រទេសក្រីក្រអាចប្រឈមនឹងការរង់ចាំយូរ៕

ប្រែសម្រួលដោយ៖ Vann Vann

ប្រភព៖ Mirror

ចុចអាន៖ វ៉ាក់សាំងកូវីដក្រុមហ៊ុនកូរ៉េខាងត្បូងមួយទទួលបានការអនុម័តឲ្យប្រើប្រាស់ក្នុងករណីពិសេស

ចុចអាន៖ សហរដ្ឋអាមេរិកត្រៀមអនុម័តឲ្យប្រើប្រាស់វ៉ាក់សាំងកូវីដមួយទៀត