រុស្ស៊ី គំរាមបញ្ជូនអាវុធនុយក្លេអ៊ែរទៅសមុទ្របាល់ទិក បើ ២ប្រទេសនេះ ហ៊ានចូល ​ណាតូ

បន្ទាប់ពីប្តេជ្ញាពង្រឹងការការពារនុយក្លេអ៊ែររបស់ខ្លួននៅតំបន់បាល់ទិក, ប្រទេសរុស្ស៊ី បានគំរាមកំហែងអំពីផលវិបាកធ្ងន់ធ្ងរ ប្រសិនបើប្រទេសស៊ុយអែត និងហ្វាំងឡង់ ចូលរួមជាមួយអង្គការណាតូ។

វិមានក្រឹមឡាំងកំពុងបង្កើនវោហាសាស្ត្រសម្លុតរបស់ខ្លួន ដោយទីក្រុងមូស្គូគំរាមថា សមាជិកភាពណាតូនឹងបង្កឲ្យមានការបំផ្លិចបំផ្លាញក្នុងប្រទេសទាំងពីរ។

លោក Dmitry Medvedev អនុប្រធានក្រុមប្រឹក្សាសន្តិសុខរបស់រុស្ស៊ីបាននិយាយថា “មិនអាចមានការពិភាក្សាអំពីស្ថានភាពគ្មាននុយក្លេអ៊ែទៀតទេសម្រាប់បាល់ទិក តុល្យភាពត្រូវតែត្រូវបានស្តារឡើងវិញ”។

លោកនិយាយថា “តាមធម្មជាតិ យើងនឹងត្រូវពង្រឹងព្រំដែនទាំងនេះ។ រហូត​មក​ដល់សព្វ​ថ្ងៃ រុស្ស៊ី​មិន​បាន​ចាត់​វិធានការ​បែប​នេះ​ទេ។ ប្រសិន​បើ​យើង​ត្រូវ​បានគេ​បង្ខំ ត្រូវចាំថា វានឹងមិនមែនជារឿងដែលយើងចង់ធ្វើនោះទេ”។

អតីតប្រធានាធិបតីរូបនេះបានបន្ថែមថា រុស្ស៊ីនឹងពង្រឹងក្រុមកងកម្លាំងជើងគោក និងការពារដែនអាកាស ហើយដាក់ពង្រាយកម្លាំងទ័ពជើងទឹកសំខាន់ៗនៅក្នុងឈូងសមុទ្រហ្វាំងឡង់។

ការគំរាមកំហែងនេះ កើតឡើងបន្ទាប់ពីប្រទេសស៊ុយអែត និងហ្វាំងឡង់បានខិតកាន់តែជិតក្លាយជាសមាជិកភាពណាតូ ហើយការដាក់ពាក្យសុំរបស់ពួកគេ អាចត្រូវបានពិនិត្យក្នុងរយៈពេលប៉ុន្មានសប្តាហ៍ខាងមុខ។

នាយករដ្ឋមន្ត្រីស៊ុយអែត លោកស្រី Magdalena Andersson ត្រូវបានគេយល់ថា ចង់ឲ្យប្រទេសខ្លួនចូលរួមក្នុងសម្ព័ន្ធភាពឆ្លងមហាសមុទ្រអាត្លង់ទិកមួយនេះ ត្រឹមខែមិថុនា៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក Zelensky ដាច់ចិត្ត ទម្លាយតួលេខទាហានអ៊ុយក្រែន ស្លាប់និងរបួស