ព័ត៌មានអន្ដរជាតិ

បុណ្យចូលឆ្នាំថ្មី មីយ៉ាន់ម៉ាដោះលែងអ្នកទោសជាង១៦០០នាក់

បានផុស

៣ years មុន

នៅ

ថ្ងៃចន្ទ ១៨ មេសា ២០២២

ដោយ

ក្រុមគ្រួសារ និងសាច់ញាតិរាប់រយនាក់បានប្រមូលផ្តុំគ្នានៅពន្ធនាគារ Insein របស់ប្រទេសមីយ៉ាន់ម៉ាកាលពីថ្ងៃអាទិត្យម្សិលមិញ បន្ទាប់ពីរដ្ឋាភិបាលយោធាបានប្រកាសដោះលែងអ្នកទោសជាង១៦០០នាក់ក្នុងឱកាសពិធីបុណ្យចូលឆ្នាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំនួនអ្នកទោសត្រូវបានដោះលែងប្រចាំឆ្នាំគឺជាផ្នែកមួយនៃអ្នកទោស២៣០០០នាក់កាលពីឆ្នាំមុន។ គេមិនច្បាស់ទេថាតើ ការដោះលែងនេះមានទាំងសមាជិករដ្ឋាភិបាលស៊ីវិលដែលត្រូវបានផ្តួលរំលំដោយរដ្ឋប្រហារកាលពីថ្ងៃទី១ ខែកុម្ភៈ ឆ្នាំ២០២១ឬយ៉ាងណា។

អ្នកសារព័ត៌មានក្នុងស្រុកម្នាក់បានប្រាប់ទីភ្នាក់ងារសារព័ត៌មាម Reuters ពីទីតាំងពន្ធនាគារថា មិនមានអ្នកតវ៉ានយោបាយត្រូវបានដោះលែងទេរហូតដល់ពេលនេះនៅពន្ធនាគារ Insein។

លោកឧត្តមសេនីយ៍ឯក Aung Lin Dwe ជារដ្ឋលេខាយោធាមីយ៉ាន់ម៉ាបានចុះហត្ថលេខាលើសេចក្តីថ្លែងការណ៍មួយដែលបានប្រកាសដោះលែងអ្នកទោសចំនួន ១៦១៩នាក់ ក្នុងនោះមានជនបរទេស៤២នាក់ ក្នុងឱកាសពិធីបុណ្យចូលឆ្នាំថ្មី។

យោធាមីយ៉ាន់ម៉ាបានចាប់ខ្លួនមនុស្សហោចណាស់ ១៣២៨២នាក់ និងសម្លាប់១៧៥៦នាក់ចាប់តាំងពីរដ្ឋប្រហារមក។ នេះបើយោងតាមទិន្នន័យរបស់សមាគមជំនួយអ្នកទោសនយោបាយ (AAPP)។

ក្នុងចំណោមអ្នកជាប់ឃុំខ្លួនមានទាំងមេដឹកនាំរដ្ឋាភិបាលបណ្តេញចេញជាម្ចាស់មេដាយសន្តិភាពណូបែល លោកស្រី អ៊ុងសាន ស៊ូជី ប៉ុន្តែត្រូវបានឃុំខ្លួននៅរដ្ឋធានី Naypyidaw ហើយជំនួយការសេដ្ឋកិច្ចជនជាតិអូស្ត្រាលីរបស់លោកស្រីគឺលោក Sean Turnell ស្ថិតនៅពន្ធនាគារ Insein ជាយក្រុងយ៉ាំងហ្គោន៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសមីយ៉ាន់ម៉ា