ជំនួយការលោក Zelensky អួតថា សង្គ្រាមដំណាក់កាលទី ២ របស់ រុស្ស៊ី លើ អ៊ុយក្រែន ៩៩ ភាគរយនឹងបរាជ័យ

លោក Oleksiy Arestovych ជំនួយការម្នាក់របស់លោកប្រធានាធិបតី Volodymyr Zelenskyy បាននិយាយថា សង្គ្រាមដំណាក់ទី ២ របស់រុស្ស៊ីនៅភាគខាងកើតអ៊ុយក្រែនកំពុងដំណើរការដោយប្រុងប្រយ័ត្ន ហើយអាចនឹងបរាជ័យ ។

លោក Oleksiy Arestovych បាននិយាយនៅក្នុងសុន្ទរកថាតាមទូរទស្សន៍ថា ទីក្រុងមូស្គូនឹងមិនអាចសម្រេចបាននូវមហិច្ឆតារបស់ខ្លួនក្នុងការដណ្ដើមយកតំបន់ Donbass សម្រាប់ការលុកលុយថ្មីនេះបាននោះទេ ។

លោកបញ្ជាក់ថា កងទ័ពរុស្ស៊ីកំពុងព្យាយាមស្វែងរកចំណុចរសើបដើម្បីទម្លុះការការពាររបស់អ៊ុយក្រែន ហើយលោក​បាន​អះអាង​ថា ទីក្រុង​មូស្គូ​មិន​មាន​កម្លាំង​គ្រប់គ្រាន់​ក្នុង​ការ​វាយ​លុកថ្មីនេះឡើយ ។

លោក Oleksiy Aretovych បានធានាថា “៩៩ ភាគរយសម្រាប់ការវាយលុកលើកទី ២ របស់រុស្ស៊ីលើអ៊ុយក្រែនក្នុងតំបន់ Donbass នឹងទទួលការបរាជ័យ” ។

គួរបញ្ជាក់ថា ការលើកឡើងរបស់លោក Oleksiy Aretovych កើតឡើងតែប៉ុន្មានម៉ោងប៉ុណ្ណោះ បើទោះជាកងកម្លាំងរុស្ស៊ីបានវាយដណ្ដើមយកទីក្រុង Kreminna ភាគខាងកើតប្រទេសអ៊ុយក្រែន ពោលជាទីក្រុងទី ១ សម្រាប់ការលុកលុយថ្មីនេះក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ មេ UN ឲ្យ រុស្ស៊ី និង អ៊ុយក្រែន ផ្អាកប្រយុទ្ធគ្នា ៤ ថ្ងៃសិន