មេដឹកនាំជាន់ខ្ពស់ក្រុម ISIS ត្រូវបានសម្លាប់ក្នុងការវាយប្រហារតាមអាកាស ដោយសម្ព័ន្ធមិត្តអាហ្វ្រិក

គេហទំព័រព័ត៌មានរបស់ប្រទេសនីហ្សេរីយ៉ា Leadership បាននិយាយកាលពីថ្ងៃអង្គារថា មេដឹកនាំជាន់ខ្ពស់នៃក្រុម ISIS នៅអាហ្រ្វិកខាងលិច (ISWA) ត្រូវបានសម្លាប់នៅក្នុងការវាយប្រហារតាមអាកាសដែលធ្វើឡើងដោយសម្ព័ន្ធមិត្តអាហ្រ្វិកនៅឯគោលដៅរបស់ក្រុមជីហាដក្នុងតំបន់អាង Chad Basin ។

ប្រភពបានប្រាប់សារព័ត៌មានថា លោក Ammar Bin-Umar ត្រូវបានសម្លាប់នៅក្នុងប្រតិបត្តិការសន្តិសុខមួយដែលបានធ្វើឡើងកាលពីសប្តាហ៍មុនដោយកងកម្លាំងអាកាសនៃប្រទេសនីហ្សេ និងនីហ្សេរីយ៉ា ។

សារព័ត៌មាន Leadership បានចុះផ្សាយទៀតថា “លោក Bin-Umar គឺស្ថិតក្នុងចំណោមគណៈកម្មាធិការសន្ទនាកំពូលរបស់ក្រុម ISIS Mujahedeens ដែលត្រូវបានដាក់ពង្រាយបន្ថែមទៅកាន់ក្រុម Boko Haram នៅខេត្ត West Africa ក្នុងខែកុម្ភៈ ឆ្នាំ ២០២២” ។

ភេរវករតែងតែមានសកម្មភាពនៅក្នុងតំបន់អាង Chad Basin ជាកន្លែងដែលពួកសកម្មប្រយុទ្ធចូលរួមនៅក្នុងការបះបោរប្រឆាំងនឹងប្រទេសនីហ្សេរីយ៉ា កាមេរូន ឆាដ និងនីហ្សេរីយ៉ា ។

ទន្ទឹមនោះសម្ព័ន្ធមិត្ត​ទាំង​ ៤ ក៏បាន​បង្កើត​ក្រុម​ការងារ​ចម្រុះ​ជាតិ​សាសន៍​មួយផងដែរ​ដើម្បី​ប្រយុទ្ធ​ប្រឆាំង​នឹង​សាខា​ក្រុម​ ISIS ក្នុងតំបន់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik