ពិភាក្សាជាមួយចិនម្សិលមិញ អាមេរិកលើកឡើងអំពី សារសំខាន់នៃការមិនផ្គត់ផ្គង់អាវុធទៅឲ្យ រុស្ស៊ី

រដ្ឋមន្ត្រីក្រសួងការពារជាតិអាមេរិក លោក Lloyd Austin និងរដ្ឋមន្ត្រីក្រសួងការពារជាតិចិន លោក Wei Fenghe បានសន្ទនាគ្នាតាមទូរសព្ទកាលពីថ្ងៃពុធទី២០ខែមេសាម្សិលមិញនេះ ដែលជាលើកទីមួយ ចាប់តាំងពីលោកប្រធានាធិបតី Joe Biden ឡើងកាន់អំណាចជាងមួយឆ្នាំមុន។

មន្ត្រីអាមេរិកម្នាក់បានប្រាប់រ៉យទ័រថា ក្នុងការហៅទូរសព្ទមានរយៈពេលប្រហែល ៤៥ នាទី លោក Austin បានរំលឹកឡើងវិញពីសារសំខាន់នៃការមិនផ្គត់ផ្គង់អាវុធឲ្យរុស្ស៊ី ដើម្បីជួយដល់ការលុកលុយរបស់ពួកគេ។

អ្នកនាំពាក្យមន្ទីរបញ្ចកោណលោក John Kirby បាននិយាយថា មេដឹកនាំទាំងពីរបានពិភាក្សាគ្នាអំពី បញ្ហាសន្តិសុខក្នុងតំបន់ និងការលុកលុយដោយមិនញញើតរបស់រុស្ស៊ីលើអ៊ុយក្រែន។

ចំណែកលោក Wei បានរំលឹកឡើងវិញនូវជំហររបស់ចិនថា តៃវ៉ាន់គឺជាផ្នែកមួយរបស់ចិន។ សេចក្តីថ្លែងការណ៍របស់លោក Wei បាននិយាយថា “ប្រសិនបើបញ្ហាតៃវ៉ាន់មិនត្រូវបានដោះស្រាយឲ្យបានត្រឹមត្រូវទេនោះ វានឹងជះឥទ្ធិពលយ៉ាងធ្ងន់ធ្ងរដល់ទំនាក់ទំនងចិន-អាមេរិក”។

គួរបញ្ជាក់ថា អាមេរិក​បាន​ផ្តល់​អាវុធ​ដល់​តៃវ៉ាន់ ​ដើម្បី​ជួយ​កោះមួយ​នេះ ឲ្យ​ទប់ទល់នឹង​ជម្លោះ​ដ៏​មាន​សក្តានុពល​ជាមួយ​ចិន​ដីគោក។

ការវាយលុករបស់រុស្ស៊ីលើអ៊ុយក្រែន បានធ្វើឲ្យកោះតៃវ៉ាន់មានការប្រុងប្រយ័ត្នខ្ពស់ ចំពោះលទ្ធភាពដែលថា ទីក្រុងប៉េកាំងនឹងប្រើប្រាស់សង្រ្គាមអ៊ុយក្រែន ដើម្បីធ្វើសកម្មភាពប្រឆាំងនឹងប្រទេសនេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ ន័រវែស បរិច្ចាគមីស៊ីល ១០០គ្រាប់ដល់ អ៊ុយក្រែន