លោក​ José​ ឈ្នះ​​ការ​​បោះ​​ឆ្នោត​​ប្រធានា​ធិបតី​​ទីម័រ​ខាង​​កើត​​ភ្លូក​ទឹក-ដី

ម្ចាស់ពានរង្វាន់ណូបែលសន្តិភាព លោក José Ramos-Horta ទទួលបានជ័យជម្នះភ្លូកទឹកភ្លូកដីក្នុងការបោះឆ្នោតជ្រើសរើសប្រធានាធិបតីទីម័រខាងកើត។ នេះបើយោងតាមលទ្ធផលបឋមរបស់គណៈកម្មការរៀបចំការបោះឆ្នោត។

យោងតាមគេហទំព័ររបស់លេខាធិការដ្ឋាននៃគណៈកម្មការរៀបចំការបោះឆ្នោតបានផ្សាយកាលពីថ្ងៃពុធ បន្ទាប់ពីសន្លឹកឆ្នោតទាំងអស់ត្រូវបានរាប់បង្ហាញថា លោក លោក José Ramos-Horta អាយុ៧២ឆ្នាំទទួលបានសំឡេងគាំទ្រ ៣៩៧ ១៤៥សំឡេង ឬស្មើនឹង ៦២.០៩% ដែលឈ្នះដាច់លើលោក Francisco Guterres ដែលទទួលបាន ២៤២ ៤៤០ សំឡេង ឬស្មើ ៣៧.៩១%។

«ការរាប់សន្លឹកឆ្នោតថ្នាក់ស្រុក តំបន់ និងជាតិត្រូវបានធ្វើរួចរាល់ហើយ»។ លោក Acilino Manuel Branco អគ្គលេខាធិការនៃគណៈកម្មការរៀបចំការបោះឆ្នោតបាននិយាយ។

ជ័យជម្នះនេះបានផ្តល់ឲ្យលោក Ramos-Horta កាន់អំណាចអាណត្តិទី២។ លោកធ្លាប់បានកាន់តំណែងជាប្រធានាធិបតីនៃប្រទេសក្មេងខ្ចីជាងគេបំផុតនៅតំបន់អាស៊ីអាគ្នេយ៍ពីឆ្នាំ២០០៧ដល់២០១២ ហើយក៏ជានាយករដ្ឋមន្ត្រីទី១របស់ប្រទេសផងដែរ។

«ការបោះឆ្នោតមានការប្រកួតប្រជែង ហើយយុទ្ធនាការឃោសនាគឺប្រកបដោយសន្តិភាព»។ អ្នកឃ្លាំមើលសហភាពអឺរ៉ុប លោក Domenec Ruiz Devesa បាននិយាយ និងបន្ថែមថា ដំណើរការរាប់សន្លឹកឆ្នោតត្រូវបានធ្វើប្រកបដោយវិជ្ជមាន។

លោក Ramos-Horta នឹងចូលកាន់តំណែងនៅថ្ងៃទី២០ ខែឧសភាខាងមុខនេះចំពេលខួបលើកទី២០នៃការទទួលបានឯករាជ្យពីប្រទេសឥណ្ឌូណេស៊ីដែលបានកាន់កាប់អតីតអាណានិគមព័រទុយហ្គាល់អស់រយៈពេល២៤ឆ្នាំ។
លោកបានសន្យាប្រើប្រាស់អាណត្តិរយៈពេល៥ឆ្នាំដើម្បីបំបែកភាពជាប់គាំងយូរអង្វែងរវាងគណបក្សនយោបាយសំខាន់២។

មនុស្សជិត ៨៦០ ០០០នាក់ក្នុងប្រទេសដែលមានប្រជាជន១.៣លាននាក់មានសិទ្ធិបោះឆ្នោត និងជាង៧៥%នៃអ្នកបោះឆ្នោតបានចេញទៅបោះឆ្នោតនៅក្នុងជុំទី២។

លោក Ramos-Horta បាននិយាយថា លោកបានចេញពីការចូលនិវត្តន៍ដើម្បីឈរឈ្មោះម្តងទៀតដោយសារតែលោកជឿថា ប្រធានាធិបតីដែលចាកចេញបានបំពានរដ្ឋធម្មនុញ្ញ។ លោកបានឈានមុខគេក្នុងការបោះឆ្នោតជុំទី១កាលពីថ្ងៃទី១៩ ខែមីនា ដោយទទួលបានសំឡេងគាំទ្រ៤៦% ទល់នឹងលោក Guterres ដែលទទួលបាន២២% ប៉ុន្តែ​ជុំ​ទី​១​នោះ​នៅតែមិនធានាបានសំឡេងភាគច្រើន។

សូមបញ្ជាក់ថា លោក Ramos-Horta ទទួលបានពានរង្វាន់ណូបែលសន្តិភាពកាលពីឆ្នាំ១៩៩៦សម្រាប់កិច្ចខិតខំប្រឹងប្រែងរបស់លោកក្នុងការដោះស្រាយជម្លោះនៅទីម័រខាងកើត។ ក្នុងឆ្នាំ២០០៨ លោករស់​រាន​មានជីវិតពីការប៉ុនប៉ងធ្វើឃាត៕

ប្រែសម្រួល៖ វីរបុត្រ
ប្រភព៖ Theguardian