រុស្ស៊ី ដាក់ទាហានស៊ីឈ្នួលបរទេសដល់ទៅ ២ ម៉ឺននាក់ក្នុងសង្គ្រាមអ៊ុយក្រែន ដំណាក់កាលថ្មី

យោងតាមសារព័ត៌មានជាច្រើនបានឲ្យដឹងថា វិមានក្រឹមឡាំងបានជួលទាហានស៊ីឈ្នួលចន្លោះពី ១០,០០០ ទៅ ២០,០០០ នាក់ដើម្បីប្រយុទ្ធនៅភាគខាងកើតអ៊ុយក្រែន រួមទាំងយុទ្ធជនថ្មើរជើងមកពីប្រទេសស៊ីរី និងលីប៊ីផងដែរ ។

ដោយដកស្រង់សម្ដីពីក្រុមមន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះនៅក្នុងសន្និសីទមួយក្នុងទីក្រុងវ៉ាស៊ីនតោន, កាសែត The Guardian បានរាយការណ៍ថា វាពិបាកក្នុងការបំបែកចំនួនអ្នកប្រយុទ្ធមកពីប្រទេសនីមួយៗ ប៉ុន្តែបានកត់សម្គាល់ថា ពួកគេទាំងអស់ត្រូវបានជួលដោយក្រុមហ៊ុនយោធាឯកជន Wagner Group ដើម្បីយកទៅប្រយុទ្ធនៅតំបន់ Donbas ។

ចំណែកបើយោងតាមកាសែត The Guardian បានឲ្យដឹងថា ក្រុម Wagner Group ដែលត្រូវបានគេដឹងថាមានទំនាក់ទំនងជិតស្និទ្ធជាមួយប្រធានាធិបតីរុស្ស៊ី វ្ល៉ាឌីមៀ ពូទីន បាននិងកំពុងជួយក្រុងមូស្គូក្នុងការដឹកជញ្ជូនទាហានទៅកាន់អ៊ុយក្រែន ។

ដោយឡែកកាសែត The New York Times បានរាយការណ៍ថា កន្លងមករុស្ស៊ី​ធ្លាប់​ដាក់​ពង្រាយ​យុទ្ធជន​ស៊ីរី​នៅ​អ៊ុយក្រែន ប៉ុន្តែ​ក្នុង​ចំនួន​តិច​ជាងនេះទេ ហើយនៅថ្ងៃទី ៣១ ខែមីនា ទាហានស៊ីឈ្នួលស៊ីរីជាច្រើនរយនាក់បានមកដល់ប្រទេសនេះ រួមទាំងទាហានមកពីកងពលធំដែលធ្វើការជាមួយមន្ត្រីរុស្ស៊ីដែលគាំទ្ររបបលោក Assad ។

គួរបញ្ជាក់ថា ការកើនឡើងនៃការដាក់ពង្រាយទាហានស៊ីឈ្នួលកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃចន្ទថា ទីក្រុងមូស្គូបានបើកការវាយលុកជាថ្មីលើតំបន់ Donbas ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ រុស្ស៊ី ប្រាប់គោលដៅធំៗចំនួន ៣ សម្រាប់សង្គ្រាមដំណាក់ទី ២ នៅអ៊ុយក្រែន